Charles Spencer, vëllai i të ndjerës Princeshë Diana, ka bërë pretendime të reja në kujtimet e tij të ardhshme, duke rrëfyer një telefonatë me Mbretin Charles disa ditë pas vdekjes së motrës së tij. Sipas një fragmenti të publikuar nga Daily Mail, Spencer pretendon se Charles i tha: “Do ta harrojmë shumë shpejt”.
Në një tjetër fragment të publikuar të enjten, Spencer pretendon se Mbreti Charles, i cili në atë kohë ishte Princ i Uellsit, “tingëllonte jashtëzakonisht i gëzuar – si një fitues lotarie” kur foli me të në telefon natën e vdekjes së Dianës.
Diana, Princesha e Uellsit, humbi jetën në gusht të vitit 1997, pasi pësoi dëmtime të brendshme në një aksident automobilistik me shpejtësi të lartë në Paris. Në ceremoninë mortore, disa ditë më vonë, dy djemtë e saj, William dhe Harry, të cilët në atë kohë ishin përkatësisht 15 dhe 12 vjeç, ecën në kortezhin funeral.
Pallati Buckingham reagoi të mërkurën ndaj pretendimeve të Spencer, në një deklaratë të pazakontë dhe të drejtpërdrejtë, duke sugjeruar se dhimbja e humbjes së motrës mund të ketë ndikuar në gjykimin dhe kujtesën e tij.
“Edhe pse në parim nuk komentojmë libra, Madhëria e Tij është i vetëdijshëm se dhimbja e humbjes së një vëllai apo motre mund të turbullojë arsyen, të ndikojë në gjykim dhe të ngjyrosë kujtesën në mënyra që të tjerët nuk i kuptojnë, edhe shumë vite pas një humbjeje të tillë”, deklaroi një zëdhënës i pallatit.
Të kontaktuar nga CNN të enjten lidhur me fragmentet e reja, përfaqësuesit e Pallatit Buckingham thanë se “nuk kanë asgjë më shumë për të shtuar” përtej deklaratës së publikuar një ditë më parë.
Në librin e tij, Spencer përshkruan edhe një telefonatë të tensionuar me Charles, pas një debati lidhur me pjesëmarrjen e William dhe Harry në kortezhin funeral të nënës së tyre.
“Princi Charles vazhdoi shpërthimin e tij të zemërimit, pa e ndërprerë unë. Pastaj heshti”, shkruan Spencer. “Mendova se heshtja ishte një përpjekje për të marrë veten, por më pas ai shpërtheu në telefon duke shprehur atë që unë gjithmonë e kam konsideruar si përbuzjen e tij të fshehur ndaj Dianës dhe tmerrin e tij që e gjithë bota ishte aq e tronditur nga vdekja e saj.”
“‘Ji i sigurt’, pëshpëriti ai me një ton kërcënues, ‘do ta harrojmë shumë shpejt!’”, shkruan Spencer.
“‘Nuk mund ta besoj që sapo e the këtë’, i thashë shkurt dhe mbylla telefonin”, vijon rrëfimi i tij.
Fragmentet e librit përmbajnë gjithashtu rrëfime të Spencer mbi marrëdhënien e trazuar mes Dianës dhe Charles.
Sipas tij, Diana kishte gjetur një byzylyk që i fejuari i saj i atëhershëm, Charles, ia kishte blerë Camillës. Spencer pretendon se motra e tij më pas kishte tentuar të ndërpriste fejesën.
Libri përmend gjithashtu një koment të Charles, i cili, sipas Spencer, e kishte quajtur Dianën “topolake” menjëherë pas fejesës. Sipas rrëfimit, komenti kishte qenë veçanërisht i dhimbshëm për Dianën, e cila kishte vuajtur nga një çrregullim i të ushqyerit.
Shumë prej këtyre episodeve janë raportuar më parë nga biografë dhe media të ndryshme.
Kujtimet e Charles Spencer, të titulluara Swan Song, pritet të publikohen javën e ardhshme dhe pritet të përmbajnë kritika të forta ndaj familjes mbretërore.
CNN raportoi se nuk e ka parë librin përpara publikimit, ndërsa një zëdhënës i Penguin Random House konfirmoi se pasazhet e cituara nga Daily Mail përputhen me përmbajtjen e librit.
Daily Mail ka siguruar të drejtat ekskluzive për publikimin e fragmenteve të librit, në kuadër të një serie që nisi të enjten. Gazeta britanike e ka përshkruar librin si “shpërthyes”.