Një shpërthim ka ndodhur në qendër të Athinës, pranë zyrave të kompanisë hekurudhore greke Hellenic Train.
Pamjet nga kamerat e sigurisë tregojnë momentin kur një shpërthim godet një çantë shpine, e cila mendohet të jetë lënë jashtë godinës së zyrave të premten në mbrëmje.
Policia konfirmoi se disa telefonata anonime janë bërë në redaksitë e mediave greke duke paralajmëruar për sulmin, që ndodhi pranë një prej rrugëve më të frekuentuara të kryeqytetit, Leoforos Andrea Siggrou. Deri më tani nuk janë raportuar viktima apo të plagosur.
Ministri i Transportit të Greqisë, Christos Staikouras, e dënoi aktin si një “krim që vuri në rrezik jetë njerëzish”.
Sipas mediave lokale Efsyn dhe Zougla, të cilat morën telefonatat paralajmëruese, pajisja shpërthyese ishte vendosur brenda një çante të mbyllur me dry dhe më pas ishte lënë mbi një skuter pa targa.
Njësia për çaktivizimin e bombave arriti në vendngjarje, por nuk mundi të ndërhynte në kohë për të neutralizuar pajisjen përpara se të shpërthente.
Ministri Staikouras deklaroi:
“Ky është një akt kriminal, i dënueshëm në mënyrë të pakushtëzuar. Ngjarja ndodhi në një zonë qendrore të Athinës, gjatë orarit të trafikut më të ngarkuar, duke rrezikuar jetën e punonjësve dhe kalimtarëve të rastësishëm.”
Ai shtoi gjithashtu se:
“Asgjë nuk justifikon terrorizmin. Asnjë akt dhune nuk sjell drejtësi. Tani është radha e autoriteteve dhe gjyqësorit për të vepruar.”
Hellenic Train konfirmoi se asnjë punonjës apo qytetar nuk ka pësuar lëndime, ndërsa dëmet materiale janë të kufizuara.
Në një deklaratë, kompania theksoi:
“Dënojmë pa mëdyshje çdo formë dhune dhe tensioni që ushqen klimën e toksicitetit dhe pengon çdo përparim.”
Megjithëse shkaku i shpërthimit ende nuk është zbardhur plotësisht, ai vjen në një moment të tensionuar në opinionin publik, pas tragjedisë së rëndë hekurudhore që ndodhi mbi dy vjet më parë.
Në shkurt të vitit 2023, një tren mallrash dhe një tren pasagjerësh me rreth 350 persona në bord u vendosën aksidentalisht në të njëjtën linjë, duke shkaktuar përplasjen fatale. Gjashtëdhjetë e shtatë persona humbën jetën, shumica studentë të rinj. Dhjetëra të tjerë mbetën të plagosur.
Që nga ajo kohë, në Greqi janë organizuar protesta të shumta, përfshirë edhe manifestime për përvjetorin e dytë të aksidentit. Disa prej këtyre protestave kanë degjeneruar në përplasje të dhunshme mes protestuesve dhe forcave të rendit, ku janë përdorur gurë, bomba molotov, gaz lotsjellës dhe topa uji.
Një hetim i përfunduar në shkurt doli në përfundim se përplasja ishte pasojë e gabimit njerëzor, mirëmbajtjes së dobët dhe mungesës së stafit të mjaftueshëm. Data e nisjes së gjyqit për këtë ngjarje ende nuk është përcaktuar.