Agjencia e Kombeve të Bashkuara për energjinë bërthamore ka njoftuar se mburoja mbrojtëse e termocentralit bërthamor në Çernobil është jofunksionale për shkak të dëmeve të shkaktuara nga dronët. Ukraina për këtë e fajëson Rusinë.
Fjala është për mburojën e njohur si “Konvoji i Sigurisë” ose Arka, e cila u ndërtua pas katastrofës bërthamore në Çernobil më 1986 me qëllim të ndalimit të përhapjes së rrezatimit. Nga Agjencia Ndërkombëtare për Energjinë Atomike (IAEA), e cila është agjenci e OKB-së, javën e kaluar u njoftua se me një sulm me dron në shkurt të këtij viti ishte dëmtuar struktura e mburojës, raporton reuters.
Drejtori i IAEA-s, Rafael Grossi, deklaroi se mburoja e ka humbur funksionin e saj kryesor të sigurisë, por se nuk ka pasur dëmtime të përhershme të strukturës mbajtëse apo të sistemit të monitorimit. Ai theksoi se janë kryer disa riparime, por se është i domosdoshëm një ndërhyrje gjithëpërfshirëse për të parandaluar degradimin e mëtejshëm dhe për të siguruar sigurinë bërthamore afatgjatë.
Më 14 shkurt të këtij viti, OKB-ja njoftoi autoritetet ukrainase se centrali ishte goditur nga një dron me kokë luftarake shumë-eksplozive, duke shkaktuar zjarr dhe dëmtim të mburojës në zonën rreth reaktorit numër katër, i cili ishte shkatërruar në katastrofën e vitit 1986. Rusia ka mohuar pretendimin e Ukrainës se ajo është përgjegjëse për këtë sulm me dron.
Në muajin shkurt, OKB-ja siguroi se niveli i rrezatimit kishte mbetur normal dhe stabil, dhe nuk kishte raportime për rritje të tij.
Katastrofa e vitit 1986 shkaktoi përhapjen e rrezatimit nëpër Evropë, duke detyruar autoritetet sovjetike të përballeshin me pasojat me një numër të madh njerëzish dhe pajisjesh. Reaktori i fundit funksional i centralit u mbyll 25 vjet më parë.
Rusia e pushtoi këtë objekt dhe zonën përreth tij një muaj pas fillimit të agresionit ndaj Ukrainës në shkurt të vitit 2022.