“Zelensky shqiptar”! Kështu e ka cilësuar revista Politico aktorin Florian Binaj, i cili do të jetë kandidati i opozitës për Bashkinë e Tiranës në zgjedhjet e 9 Nëntorit.
Politico vendos në fokus imitimin që Florian Binaj i bën kryeministrit Edi Rama, teksa cilësohet nga kryedemokrati Berisha si një aktivist i guximshëm dhe që mishëron pikërisht atë që opozita shqiptare ka kërkuar: jo vetëm një mënyrë për të zgjeruar mbështetjen, por edhe një përgjigje ndaj kërkesës në rritje për figura publike të pastra, të reja dhe urbane.
Quajeni “Zelenskyi shqiptar”.
Satiristi i njohur Florjan Binaj ka shpallur kandidaturën e tij për kryetar të Bashkisë së Tiranës, me mbështetjen e liderit të opozitës, Sali Berisha.
Zgjedhjet e parakohshme do të mbahen më 9 nëntor në kryeqytetin shqiptar, pasi ish-kryetari Erion Veliaj u shkarkua nga posti pas arrestimit për dyshime për korrupsion dhe shpërdorim detyre, akuza të cilat ai i mohon. Fituesi i garës do të mbajë detyrën për një mandat dyvjeçar, deri në zgjedhjet e ardhshme vendore.
Binaj, i njohur për imitimet e tij të jashtëzakonshme të kryeministrit socialist Edi Rama dhe për paraqitjet në emisionet televizive në oraret më të ndjekura, shpalli zyrtarisht kandidaturën të shtunën.
“Kam vendosur të shpall kandidaturën time për kryetar të Bashkisë së Tiranës… Besoj se kontributi im do të shërbejë, edhe pse për një gjysmë mandati, për shpresë dhe bashkim, duke përmirësuar jetën e të gjithë qytetarëve të kryeqytetit”, shkroi ai në një postim në Facebook.
Shpejt pas këtij njoftimi, Berisha, i cili përballet edhe vetë me probleme ligjore, deklaroi të hënën se të gjithë votuesit dhe partitë opozitare duhet të mbështesin kandidaturën e Binajt, me Partinë Demokratike që udhëheq thirrjen për bashkim rreth tij.
Në një deklaratë për Politico, Berisha tha: “Florjan Binaj është një aktivist i guximshëm shoqëror, një mbrojtës trim i kauzave qytetare, veçanërisht kundër korrupsionit, si në ekran ashtu edhe jashtë tij, dhe një komunikues i shkëlqyer. Ai mishëron pikërisht atë që opozita shqiptare ka kërkuar: jo vetëm një mënyrë për të zgjeruar mbështetjen, por edhe një përgjigje ndaj kërkesës në rritje për figura publike të pastra, të reja dhe urbane.”
Kandidatura e Binajt ka sjellë krahasime me presidentin ukrainas Volodymyr Zelenskyy, i cili ishte një aktor dhe komedian i suksesshëm përpara se të hynte në politikë. Por jo të gjithë janë të bindur se ai ka aftësitë për të menaxhuar buxhetin vjetor prej 250 milionë euro të kryeqytetit, me komentues lokalë që theksojnë mungesën e tij të përvojës në administratë.
“Këtu nuk bëhet fjalë për një shfaqje kabareje, por për administrimin e një qyteti,” u shpreh analisti dhe ish-politikani i Partisë Demokratike, Edvin Kulluri, në një intervistë televizive të hënën.
Binaj do të përballet me kandidaten e Partisë Socialiste dhe ish-ministren e Arsimit, Ogerta Manastirliu; aktivisten Edlira Çepani; si dhe pedagogun, autorin dhe analistin Ermal Hasimja. Zgjedhje do të mbahen gjithashtu edhe në pesë bashki të tjera.
Partia Socialiste, e cila sapo ka nisur mandatin e saj të katërt në qeverisjen qendrore, aktualisht kontrollon 54 nga 61 bashkitë e vendit.
Binaj nuk iu përgjigj kërkesës së Politico-s për koment.