1 Prill 2013! Për shqiptarët do të ishte një ditë e zakonshme, e mbushur me shaka dhe “gënjeshtra të bardha” për shkak të simbolikës së asaj dite, por për politikën dhe sidomos socialistët, do të ishte një nga ditët më të rëndësishme, që i riktheu ata në pushtet.
Në Gjirin e Lalëzit, Leonard Koka, vëllai i ish-ministrit Lefter Koka, kishte ndërmjetësuar një takim mes kryetarit të Partisë Socialiste, Edi Ramës, dhe kryetarit të LSI-së, Ilir Metës. Ky i fundit, ishte ende pjesë e qeverisë në koalicion me Partinë Demokratike të Sali Berishës.
Në kërkim të dëshpëruar të pushtetit, Edi Rama vendosi atë natë të bënte marrëveshje me një nga personat që e akuzonte më shumë, kundër të cilit ngriti gjithë socialistët dhe i solli në Bulevardin “Dëshmorët e Kombit” në 21 Janar 2011, pas video-përgjimit të publikuar nga i ndjeri Dritan Prifti.
Ish-kryeministri Sali Berisha e pagëzoi darkën me emrin “Darka e Ngjalave”, një emër që ka ngelur në kujtesën e të gjithëve edhe sot.
Pas marrëveshjes verbale në 1 Prill, të dy palët nënshkruan edhe marrëveshjen me 15 pika brenda atij muaji, teksa dolën bashkë në zgjedhjet e 23 Qershorit, duke arritur të merrnin pushtetin pas 8 vitesh qeverisje të Partisë Demokratike.
Ato 15 pika, të cilat do t’i publikojmë edhe një herë tjetër më poshtë për t’jua sjellë në kujtesë, duket se nuk janë zbatuar kurrë.
Pika 5 kishte të bënte me pushtetin që do t’i jepej Parlamentit për të kontrolluar qeverinë, por kjo jo vetëm që nuk ka ndodhur, por kontrolli i Kuvendit mbi qeverinë është në pikën më të ulët se kurrë.
Gjithashtu në marrëveshje thuhej se do të ksihte vëmendje të posaçme për zgjidhjen e konfliktit të pronave, për lirinë e biznesit dhe për rininë shqiptare. 11 vite më vonë, të tre këto çështje nuk duket të kenë bërë ndonjë progres.
Pika 15 kishte të bënte me objektivin madhor: anëtarësimi i Shqipërisë në Bahskimin europian brenda 2 mandateve. PS dhe Edi Rama janë në mandatin e tretë, por anëtarësimi edne nuk ka ndodhur.
Sot, Ilir Meta dhe Edi Rama janë sërish kundërshtarë dhe akuzat ndaj njëri-tjetrit janë shtuar më shumë se kurrë.
Këto ishin 15 pikat e marrëveshjes PS-LSI në vitin 2013:
Të bashkohen në kuadrin e koalicionit “Aleanca për Shqipërinë Europiane” Partia Socialiste e Shqipërisë dhe Lëvizja Socialiste për Integrim, bien dakord që ky bashkim të jetësojë sa më poshtë vijon:
1. Një bashkëpunim strategjik, programor dhe politik, bazuar në domosdoshmërinë e realizimit të objektivave afatgjatë dhe në nevojën e bashkëveprimit konstant mes PS e LSI, për të ndërtuar Shqipërinë Europi-ane si realitet i ri i në të ardhmen e afërt i Bashkimit Europian, përmes mirëqeverisjes së punëve të vendit çdo ditë;
2. Një zhvillim konstruktiv të bashkëpunimit mes PS e LSI, mbi parimet e kushtetutshmërisë e të ligjshmërisë, respektit të të gjithë faktorëve institucionalë, politikë e shoqërorë, garantimit të lirive e të drejtave të opozitës dhe kërkim-it të konsensusit sa më të gjerë në procesin vendimmarrës, përmes gjithëpërfshirjes e vendosjes së prioriteteve të procesit të ndërtimit të Shqipërisë Europiane mbi çdo prioritet partiak.
3. Një vullnet të palëkundur për të ga-rantuar kohezion të brendshëm të koalicionit dhe konsensus për mirëqeverisjen, në funksion të reformave të dakordësuara bashkarisht, të emërimeve që janë përgjegjësi kushtetuese e Kuvendit për të garantuar pavarësinë e institucioneve, të depolitizimit dhe modernizimit të administratës publike përmes konkurrencës e meritës.
4. Një qasje të re publike të shumicës qoftë në parlament e qoftë në qeveri, për të garantuar mbi bazën e një Kodi Etik që do të hartojmë e miratojmë bashkarisht, shprehjen e respektit më të madh për opinionin publik dhe rritjen e transparencës në qeverisje në një shkallë të panjohur deri më sot.
5. Një ndarje të re të punëve mes legjislativit dhe ekzekutivit, duke i dhënë një vlerë të re mandatit të popullit Sovran qoftë në pushtetin legjislativ qoftë në pushtetin ekzekutiv, me qëllim që kontrolli parlamentar të marrë vlerën e munguar në këto dy dekada dhe përgjegjësia qeverisëse të fitojë një cilësi të re.
6. Një pozicionim të qartë në mbrojtjen e shtresave të nevojë dhe në mbështetjen e shtresës së mesme, përmes uljes së barrës së detyrimeve apo taksave të drejtpërdrejta si edhe nxitjes së integrimit social përmes punës dhe rritjes së fuqisë blerëse.
7. Një politikë vijimësisht mbështetëse për biznesin e vogël, për të rritur vetëpunësimin dhe fuqinë ekonomike të familje-ve që merren me biznes të vogël si edhe për të filluar uljen e borxheve të familjeve të varfra ndaj biznesit të vogël.
8. Një garanci të plotë për lirinë e biznesit të madh për të stimuluar një ekonomi prodhuese duke mbrojtur lirinë e konkurrencës, duke e trajtuar punësimin si objektiv themelor të rritjes ekonomike, duke rritur përgjegjshmërinë e shtetit në raport me çdo potencial zhvillim dhe investitor vendas apo të huaj, si edhe duke rritur transparencën e cilësinë e marrëdhënieve mes qeverisë e sipërmarrjes në funksion të interesit madhor të zhvillimit ekonomik e social të vendit – çka për ne do të thotë përfshirje e sipërmarrjes në çdo vendim-marrje të rëndësishme për të dhe luftë pa kompromis arbitraritetit të organeve tatimore ndaj sipërmarrjes.
9. Një angazhim të fuqishëm për zgjidhjen e çështjes së pronës, duke siguruar transparencën e domosdoshme të procesit të kthim-kompensimit të pronave në funksion të së drejtës së mohuar të pronarëve që pas dy dekadash liri janë ende shumë që nuk gëzojnë asnjë të drejtë mbi pronën e tyre. Duke siguruar përmes një procesi të mirëorganizuar e transparent dhënien e certifikatës së tokës për të gjithë fermerët që prej dy dekadash punojnë një tokë që e kanë de facto po nuk e gëzojnë de jure. Duke realizuar me transparencë procesin e zvarritur të legalizimeve që në dy dekada ka sjellë vetëm rritjen e numrit të ndërtimeve pa leje dhe shkatërrime të mëdha të territorit.
10. Një trajtim me prioritet të sigurisë publike dhe të garantimit të paprekshmërisë së individit e të pronës, duke i shpallur një luftë të pashoqe krimit të çdo natyre dhe korrupsionit. Në këtë kontekst e shohim të pandashme ed-he sigurinë juridike për çdo qytetar, në mënyrë të barabartë, eficiente dhe të përgjegjshme duke organizuar drejtësinë si një shërbim publik të sigurt e të aksesueshëm nga te gjithë sipas nevojës. Për ne një Shqipëri e drejtë me të gjithë fillon nga mirëqeverisja për të gjithë.
11. Një politikë të re për rininë shqiptare si kontributore e pazëvendësueshme për projektin e Shqipërisë Europiane dhe integrimin e vendit ne Bashkimin Europian. Kjo vetëkupton arsimimin e një brezi me mentalitet dhe profesionalizëm europian, krijimin e mundësive reale për punësim, si dhe çdo kontribut tjetër për të përballuar sfidën e lirisë në mjedisin e një ekonomie gjithnjë e më globale.
12. Një vëmendje të posaçme ndaj barazisë gjinore duke synuar rritjen e vazhdueshme të pjesëmarrjes së gruas në përfaqësimin e popullit Sovran në nivel qendror e vendor, në mirëqeverisjen e punëve të vendit apo komunitetit në administratën publike, në biznes apo shoqërinë civile. Aleanca për Shqipërinë Europiane do të ketë objektiv të palëvizshëm të përpjekjes së saj zhdukjen e dhunës kundër gruas si edhe luftën kundër papunësisë femërore.
13. Një vendosmëri të palëkundur për të mbrojtur pasuritë natyrore të vendit, burimet nëntokësore, trashëgiminë kulturore, përmes politikash zhvillimi me një përmasë të gjelbër në kuadrin e një zhvillimi ekonomik të qëndrueshëm.
14. Një vizion europianizues që të lerë pas përgjithmonë fantazmën e nacionalizmit primitiv e të promovojë atdhedashurinë si shprehje të krenarisë kombëtare dhe të respektit për historinë si burim frymëzimi për të ardhmen, jo si gjenerator dasish e konfliktesh të së shkuarës.
15. Një objektiv madhor: Anëtarësimin e Shqipërisë në Bashkimin Europian brenda harkut të dy mandateve qeverisëse, ku të bashkuar në emër të shumicës së shqiptarëve dhe me dorën e bashkëpunimit të shtrirë ndaj përfaqësuesve të pakicës në emër të Shqipërisë Europiane, do t’i shërbejmë besnikërisht popullit shqiptar. Karta e Parimeve të bashkimit PS – LSI në kuadrin e koalicionit Aleanca për Shqipërinë Europiane do të shtjellohet me detaje në programin qeverisës të koalicionit. Këto parime do të kihen parasysh edhe në hartimin e marrëveshjes së veçantë që PS dhe LSI do të bëjnë për zgjedhjet vendore të vitit 2015. Çdo ndryshim në Kartën e Pa-rimeve mund të bëhet vetëm me konsensus përmes një amendamenti me shkrim të firmosur nga kryetarët e PS dhe LSI. Firmosur, sot, më datë 22 prill 2013.