Presidenti i Shteteve të Bashkuara, Donald Trump thotë se i dyshuari për vrasjen e Charlie Kirk është “në paraburgim”.
“I dyshuari është në paraburgim”, tha Trump gjatë një paraqitjeje në Fox News. Trump tha se dikush “shumë afër tij e dorëzoi” dhe tha se kjo do të njoftohej më vonë sot.
CNN shkruan se i dyshuari ishte gjetur nëpërmjet një pastori, i cili në fund të fundit përfshiu edhe babanë e personit.
Presidenti më tej shtoi “Ne kemi personin që mendojmë se është është ai që po kërkojmë.”
Autoritetet amerikane ndërmorën një operacion të gjerë për kapjen e personit që vrau Charlie Kirk pasditen e së mërkurës, duke u bërë thirrje qytetarëve që të paraqesin çdo informacion të mundshëm që mund të ndihmojë në hetim.
Pas publikimit të katër fotografive të reja ku shihej i dyshuari, autoritetet shpërndanë edhe një video nga kamerat e sigurisë që tregonte momentet e arratisjes, disa sekonda pas të shtënave me armë.
Në video, sipas kreut të shërbimit të sigurisë publike të Utah, Bo Mason, shfaqet një burrë që vrapon mbi çatinë e ndërtesës nga ku kishte hapur zjarr, kërcen nga një lartësi e konsiderueshme, kalon një rrugë dhe përfundon në një zonë të pyllëzuar ku më vonë u gjet edhe arma e përdorur në krim.
Në një tjetër video të publikuar nga faqja TMZ, i dyshuari shfaqet fillimisht duke ecur në lagjen Orem të Utah, duke iu afruar universitetit ku Kirk pritej të mbante një fjalim. Më pas, ai ndjek të njëjtën rrugë për t’u larguar nga vendngjarja.
Fotografitë e reja, të marra nga kamerat e sigurisë, tregojnë më qartë veshjen dhe çantën e shpinës së të dyshuarit, ndonëse një kapelë sportive dhe syze të zeza i fshihnin tiparet e fytyrës.
Hetuesit arritën të gjejnë një gjurmë gishti të dorës së majtë dhe një shenjë këpucësh që i dyshuari kishte lënë teksa largohej nga çatia e ndërtesës.