Pronat publike po jepen në ankande pa garë nga bashkitë në vendin tonë, nga të cilat kanë përfituar bizneset private.
“Në dhjetë vitet e fundit, 41 bashki në vend kanë dhënë në ankand apo me qira 6 370 hektarë tokë dhe terrene për përdorim nga biznese private. Këto ankande janë zhvilluar jashtë procedurave transparente të konkurrimit, pa u realizuar përmes Sistemit Elektronik të Prokurimit të Agjencisë së Prokurimit Publik”, raporton Open Data Albania.
Përmes procedurës “Ofertë në Zarf”, një praktikë e mbyllur dhe jo transparente, rreth 750 prona publike janë transferuar në përdorim nga privatët.
Vetëm gjatë vitit 2024, është dhënë për përdorim 2 355 hektarë, një shifër që është dy deri në tre herë më e lartë krahasuar me vitet e mëparshme.
Bizneset që fitojnë të drejtën e përdorimit përmes këtyre ankandeve bashkiake fitojnë statusin e “poseduesit jo pronar”, një status që më pas u jep atyre përparësi për privatizim pa kosto, duke u mbështetur në Ligjin “Paketa e Maleve” – një ligj i kontestuar nga organizatat joqeveritare si klientelist dhe korruptiv.