Sekretari amerikan i Mbrojtjes, Pete Hegseth, deklaroi se Shtetet e Bashkuara janë të gatshme të rifillojnë sulmet ndaj Iranit nëse nuk arrihet një marrëveshje mes Uashingtonit dhe Teheranit.
“Ne jemi më se të aftë të rifillojmë veprimet nëse është e nevojshme… kemi kapacitetet e duhura,” u shpreh Hegseth në Singapor.
Ai shtoi se rezervat ushtarake amerikane janë “plotësisht të mjaftueshme” dhe se SHBA ndodhet në një pozicion të fortë ushtarak globalisht.
Deklaratat u bënë gjatë forumit të sigurisë Shangri-La Dialogue, një nga ngjarjet kryesore për liderët e mbrojtjes, ushtrisë dhe diplomacisë në rajonin Azi-Paqësor. Hegseth theksoi se SHBA nuk e ka braktisur rajonin e Azi-Paqësorit, pavarësisht angazhimeve në konfliktin me Iranin.
“Ne mund të bëjmë dy gjëra njëkohësisht. Po fuqizojmë industrinë tonë të mbrojtjes për të prodhuar shumë më tepër municione në një kohë të shkurtër,” tha ai.
Sipas tij, presidenti Donald Trump mbetet i duruar dhe synon një marrëveshje që të garantojë se Irani nuk do të pajiset me armë bërthamore.
Të premten, Trump deklaroi se do të zhvillonte një takim në Shtëpinë e Bardhë për të marrë një “vendim përfundimtar” mbi një propozim që synon zgjatjen e një armëpushimi të hershëm, duke i dhënë më shumë kohë negociatave për një zgjidhje afatgjatë.
Sipas raportimeve, konflikti i nisur më 28 shkurt nga SHBA dhe Izraeli ka shkaktuar mijëra viktima, kryesisht në Iran dhe Liban, si dhe ka ndikuar në rritjen e çmimeve të energjisë në tregjet globale për shkak të tensioneve në Ngushticën e Hormuzit.