OpenAI po prezanton një sërë masash të reja sigurie për përdoruesit nën 18 vjeç të ChatGPT, me synim kufizimin e përdorimit të tepruar dhe forcimin e mbrojtjes së të rinjve.
Adoleshentët me llogari të reja do të mund të çaktivizojnë përgjigjet me zë njerëzor, në mënyrë që AI të duket më pak si një person real. ChatGPT do t’u dërgojë gjithashtu rikujtime të rregullta për të bërë pushime, duke u kujtuar se “është AI dhe mund të presë”.
OpenAI tha se llogaritë e adoleshentëve do të jenë të paracaktuara për përdoruesit që deklarojnë se janë nën 18 vjeç, si dhe për ata që kompania i identifikon si të tillë. Fëmijët nën 13 vjeç nuk lejohen ta përdorin shërbimin.
Të rinjtë do të mund të caktojnë orare për “Study Mode”, i cili i ndihmon me mësimet pa u dhënë drejtpërdrejt përgjigjet, si dhe “quiet times”, gjatë të cilave ChatGPT do të çaktivizohet.
Kompania po shton edhe kërkesat që lidhen me çrregullimet e të ngrënit në listën e përmbajtjeve potencialisht të dëmshme që mund t’u sinjalizohen prindërve me llogari të lidhura. Çdo sinjalizim do të shqyrtohet nga një person përpara se t’u dërgohet prindërve.
Masat e reja vijnë në një kohë kur po shtohen shqetësimet për marrëdhënien e fëmijëve me chatbot-et dhe mundësinë që disa përdorues t’i perceptojnë ato si qenie të ndërgjegjshme.
OpenAI thotë se nëntë nga dhjetë të rinj që përdorin ChatGPT e bëjnë këtë për qëllime mësimore.