Një ngjarje e rëndë është parandaluar në Tiranë ku një 48 vjeçar, i cili ndodhej në “arrest shtëpie” ka kërcënuar me hanxhar bashkëshorten dhe djalin.
Ngjarja ka ndodhur mbrëmjen e djeshme ku efektivët e Komisariatit Nr.6 në kryeqytet janë njoftuar se në një banesë në rrugën “Haki Stërmilli”, një shtetas po kanoste familjarët e tij. Pas marrjes së informacionit, ata kanë shkuar në vendin e ngjarjes.
Si rezultat i ndërhyrjes policore u parandalua ngjarja kriminale në këtë familje, si dhe u arrestua në flagrancë Elvis Bana.
Nga verifikimet rezultoi se 48-vjeçari ishte aktualisht me masë sigurie “Arrest në shtëpi”, për veprën penale “Vjedhja”.
Njoftimi i policisë:
Tiranë/Ndërhyrja e menjëhershme e Policisë parandalon ngjarje kriminale në një familje.
Ndërkohë që ishte me masë sigurie “Arrest në shtëpi”, kanoste bashkëshorten dhe djalin, se do t’i vriste, arrestohet 48-vjeçari.
Sekuestrohet mjeti prerës (hanxhar), me të cilin kanoste 48-vjeçari.
Shërbimet e Komisariatit të Policisë Nr. 6, sapo janë njoftuar se mbrëmë, në një banesë në rrugën “Haki Stërmilli”, një shtetas po kanoste familjarët e tij, për jetën, me mjet prerës (hanxhar), kanë shkuar në vendngjarje. Si rezultat i ndërhyrjes policore profesionale u parandalua ngjarja kriminale në këtë familje, si dhe u arrestua në flagrancë autori i dyshuar i rastit, shtetasi E. B., 48 vjeç, banues në Tiranë.
Nga verifikimet e mëtejshme në lidhje me rastin, rezultoi se 48-vjeçari ishte aktualisht me masë sigurie “Arrest në shtëpi”, për veprën penale “Vjedhja”.
Materialet procedurale iu referuan Prokurorisë së Tiranës, për veprime të mëtejshme.