FDA po shqyrton mundësinë për të vendosur një “black box warning” në vaksinat kundër Covid-19 — paralajmërimin më serioz të sigurisë që përdoret për barnat me rreziqe të mundshme serioze. Ky plan, i cili ende nuk është finalizuar, po drejtohet brenda agjencisë nga Dr. Vinay Prasad, një figurë e diskutueshme dhe kritik i politikave të vaksinimit.
Ekspertët e jashtëm thonë se nuk ka prova shkencore që justifikojnë një paralajmërim kaq të rëndë, dhe janë të shqetësuar për mungesë transparence, pasi nuk është bërë publik asnjë të dhënë që lidhet me vdekje të fëmijëve pas vaksinimit, të cilave Prasad iu referohet në një memo të brendshme.
Administrata e Trumpit, e cila më parë e kishte promovuar zhvillimin e vaksinave si sukses të madh, tani është zhytur në debat të brendshëm politik mbi sigurinë e tyre. Disa zyrtarë — përfshirë Robert F. Kennedy Jr. — kanë mbajtur qëndrime skeptike ndaj vaksinave, çka ka rritur shqetësimet për ndikimin e politikës në vendimmarrjen shkencore.
Në anën tjetër, Pfizer dhe Moderna vazhdojnë të deklarojnë se vaksinat e tyre janë të sigurta, të monitoruara nga rregullatorët globalë, dhe se nuk ka prova për rreziqe të reja në fëmijë apo gra shtatzëna. Studime të CDC dhe kërkime ndërkombëtare tregojnë se vaksinat kanë parandaluar miliona vdekje dhe reduktuar ndjeshëm rreziqet e sëmundjes së rëndë te fëmijët.
Ekspertët paralajmërojnë se kjo qasje e re e administratës po krijon një atmosferë mosbesimi ndaj vaksinave dhe mund të çojë në ulje të vaksinimit dhe rritje të vdekjeve të parandalueshme.