Truproja i kryeministrit të Maqedonisë së Veriut Hristijan Mickoski është arrestuar këtë të martë, pasi dyshohet se i ka dhënë informacione konfidenciale bandave kriminale.
Angel Samarakov, ish-punonjës i Ministrisë së Punëve të Brenshme është kapur duke dhënë informacione konfidenciale disa personave në lagjen e Shkupit, “Grcec”. Megjithatë nuk dihet se çfarë informacioni u ka dhënë dhe nëse ka lidhje me kreun e qeverisë.
Kjo nuk është hera e parë që një pjesëtar i sigurimit të Mickoskit përfshihet në një incident të rëndë. Vetëm pak muaj më parë, shefi i sigurimit të tij, Ivica B., ka sulmuar fizikisht një koleg polic i cili ishte në detyrë në orët e para të mëngjesit.
Sipas informacioneve të disponueshme në atë kohë, policia ka kërkuar të kontrollojë një lokal të njohur të Shkupit, i dyshuar si i lidhur me trafikun e drogës. Ivica B., i cili ishte i pranishëm në lokal, dyshohet se ka tentuar të prishë aksionin, ndaj pas ngjarjes është ndaluar.
Sipas portalit të Shkupit 24info, në të dyja këto raste shtrohet pyetja se kush janë personat nga sigurimi i kryeministrit Mickoski, kush i zgjedh dhe sipas çfarë kriteresh.