Gjykata e Apelit ka hequr sekuestron ndaj pasurive të biznesmenëve, Elman Abule dhe Kristian Boçi.
Siç bëhet me dije në një njoftim zyrtar nga Apeli, Gjykata e Shkallës së Parë e Juridiksionit të Përgjithshëm Tiranë, Dhoma Penale, kishte pranuar kërkesën e Prokurorisë për vendosjen e sekuestros ndaj Elman Abules, Kristian Boçit dhe bashkëshortes së këtij të fundit, Drilona Boçit.
Pas ankimit të paraqitur nga personat nën hetim, Apeli vendosi prishjen e këtij vendimi dhe kthimin e çështjes për rigjykim. Ndërkohë, Kolegji Penal i Gjykatës së Lartë, mbi bazën e rekursit të paraqitur, vendosi mospranimin e tij.
Pas kthimit për rigjykim, çështja iu caktua me short elektronik gjyqtarit Altin Abdiu, i cili në përfundim të shqyrtimit në dhomë këshillimi vendosi rrëzimin e kërkesës së Prokurorisë për vendosjen e sekuestros.
NJOFTIM PËR SHTYP
Mbi interesin e shfaqur nga disa gazetarë, po ju referojmë informacionin zyrtar të dhënë nga ana e gjyqtarit të çështjes, si në vijim:
Gjykata e Shkallës së Parë të Juridiksionit të Përgjithshëm Tiranë, Dhoma Penale, mori në shqyrtim kërkesën e Prokurorisë për vendosjen e sekuestros ndaj shoqërive të personave nën hetim E. A., K. B., D. B., etj., fillimisht është gjykuar nga gjyqtarja L.Ç., e cila në përfundim të gjykimit ka pranuar kërkesën e Prokurorisë pranë Gjykatës së Shkallës së Parë të Juridiksionit të Përgjithshëm Tiranë për vendosjen e sekuestros.
Mbi bazën e ankimit që kanë bërë personat nën hetim, Gjykata e Apelit të Juridiksionit të Përgjithshëm Tiranë ka vendosur:
“Prishjen e vendimit dhe kthimin e çështjes për rigjykim me tjetër trup gjykues…”
Gjithashtu mbi bazën e rekursit të bërë nga të hetuarit, Kolegji Penal i Gjykatës së Lartë ka vendosur “Mospranimin e rekursit…”
Më pas kërkesa e prokurorisë për vendosjen e sekuestros e kthyer për rigjykim i është caktuar me short elektronik gjyqtarit Altin Abdiu, i cili në zbatim dhe të orientimeve të vendimit të Gjykatës së Apelit të Juridiksionit të Përgjithshëm Tiranë në përfundim të gjykimit në “Dhomë këshillimi” ka vendosur, rrëzimin e kërkesës së Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Ky vendim i gjyqtarit nuk është ankimuar nga prokurorja e çështjes dhe vendimi ka marrë formë të prerë më datë 17.10.2025.
Bazuar në nenin 103, pika 2 e Kodit të Procedurës Penale: “Ndalohet publikimi, qoftë edhe i pjesshëm, i akteve josekrete deri në përfundimin e hetimeve paraprake”. Vendimi ju komunikohet vetëm palëve.