Kreu i PL Ilir Meta ka reaguar pasi ditën e djeshme kreu i SPAK, Altin Dumani tha se ish-Presidenti është nën hetim dhe për këtë arsye nuk mund të jepte deklarata për çështjet që janë në proces.
Ilir Meta ka deklaruar se gjithë jetën ka qenë nën hetim dhe se prokurorë të caktuar janë angazhuar personalisht për t’u marrë me të.
Ai shprehet se nuk ka asnjë forcë që mund të zhbëjë Partinë e Lirisë.
Sipas tij, Rama përpiqet ta kthejë SPAK-un në një komisariat policor kundër opozitës.
“Kam qenë gjithë jetë në hetim, prokurorë që flirtojnë me politikën, kanë marrë angazhime personale për t’u marrë me ilir Metën. Unë kam qenë këtu, do jem gjithmonë këtu përballë jush.
Të jeni të sigurt që nuk ka asnjë forcë që mund të zhbëjë Partinë e Lirisë si një parti të të vërtetave të mëdha. Nuk ka asnjë zar të Arben Rakipit për të legjitimuar kapjen e Reformës në Drejtësi nga Edi Rama, përmes shkatërrimit të proceseve kushtetuese.
Lidhur me përpjekjet e Edi Ramës për ta kthyer SPAK në një komisariat policorë, anti-opozitës, s’jemi të surprizuar, por unë s’kam dashur ta identifikoj këtë institucion me persona të caktuar, të cilët nuk flirtojnë me politikën. Këta persona në vend që të vendosin dorë mbi kushtetutë, kanë bërë betime të tjera”, u shpreh Meta.