Ndërsa Irani vazhdon të jetë nën një ndërprerje pothuajse totale të internetit që nga 28 shkurti, ka disa persona që kanë ende akses.
Megjithëse autoritetet kanë mohuar ekzistencën e një sistemi të ashtuquajtur “akses i diferencuar”, Irani ka dhënë akses selektiv për grupe të caktuara.
Përveç disa kategorive si gazetarët dhe përdoruesit pranë qeverisë që kishin akses që në fillim, kohët e fundit u është dhënë akses edhe grupeve të tjera si biznesmenët, pedagogët universitarë dhe së fundmi mjekët.
Por çfarë ndodh me ata që varen nga interneti për punën e tyre dhe që nuk bëjnë pjesë në këto grupe të përzgjedhura?
Ministri iranian i komunikimit thotë se rreth 10 milionë njerëz, nga një popullsi prej rreth 90 milionë banorësh, varen nga një “internet i qëndrueshëm” dhe se ndërprerja në vazhdim rrezikon vendet e tyre të punës.
Disa prej tyre janë detyruar të paguajnë shuma të mëdha për të siguruar lidhje, kryesisht përmes pajisjeve Starlink, të cilat janë të paligjshme në Iran.
BBC ka folur me disa persona, jeta e të cilëve varet nga krijimi i përmbajtjeve në rrjetet sociale, dhe ata kanë humbur një pjesë të madhe të të ardhurave për shkak të ndërprerjes.
“Të ardhurat e mia janë ulur në një të tretën që nga ndërprerja,” tha për BBC-në një mësues i pavarur. Ai shtoi se po përdor një aplikacion vendas për të zhvilluar mësimet, por që “u ndërpre 10 herë sot”.
Një zyrtar nga Dhoma e Tregtisë në Iran vlerësoi javën e kaluar se ndërprerjet e internetit shkaktojnë humbje direkte prej 30–40 milionë dollarësh (22–30 milionë paund) në ditë dhe 70–80 milionë dollarë (52–59 milionë paund) në total, duke përfshirë edhe ndikimet indirekte.