Dokumente të reja tronditëse nga arkivat e Jeffrey Epstein japin një rrëfim kontradiktor për orët e fundit të miliarderit pedofil, ndërsa ai ndodhej në qelinë e tij.
“Dosjet Epstein”, të publikuara së fundmi, zbulojnë se autoritetet besojnë se një i burgosur “misterioz” mund të ketë pasur qasje në zonën ku mbahej Epstein natën e vdekjes së tij.
I fshehur mes rreth tre milionë faqesh dokumentesh ligjore dhe mijëra imazhesh, ndodhet një material që duket se bie ndesh me versionin zyrtar të ngjarjeve në orët e fundit të jetës së pedofilit famëkeq.
Hetuesit federalë shqyrtuan pamjet e kamerave të sigurisë nga Qendra Korrektuese Metropolitan në Nju Jork, ku Epstein mbahej i paraburgosur, dhe vunë re një figurë të veshur me portokalli duke u ngjitur në shkallë drejt qelisë së tij natën e vdekjes.
Sipas të dhënave zyrtare, Epstein kreu vetëvrasje diku pas orës 6:30 të mëngjesit të 10 gushtit 2019, kur u gjet nga një roje burgu gjatë shpërndarjes së mëngjesit. Raporti fillestar i mjekut ligjor arriti në përfundimin se ai kishte vdekur nga vetëvarja.
Megjithatë, deri më sot nuk është përcaktuar një orë zyrtare e saktë e vdekjes, pasi dy nga kamerat që monitoronin zonën pranë qelisë së tij u gjetën të “mosfunksionuara” dhe më pas u vunë nën hetim nga FBI-ja.
Raporti thekson se në orën 22:39 të mbrëmjes së 9 gushtit 2019, agjentët e FBI-së vunë re “diçka portokalli që dukej sikur po ngjitej shkallëve të Katit L, ndoshta një i paraburgosur që po shoqërohej në atë kat”.
Këto gjetje bien ndesh me deklaratat publike të bëra më herët nga të paktën dy zyrtarë të lartë amerikanë.
Bill Barr, i cili shërbeu si Prokuror i Përgjithshëm i SHBA-së gjatë mandatit të parë të Donald Trump, deklaroi në një intervistë në vitin 2019 se kishte shqyrtuar personalisht pamjet e sigurisë, të cilat – sipas tij – konfirmonin se askush nuk kishte hyrë në zonën ku Epstein ndodhej natën kur vdiq.
Po ashtu, në maj të vitit të kaluar, ish-zëvendësdrejtori i FBI-së, Dan Bongino, i tha Fox News: “Ka video absolutisht të qarta. Ai është i vetmi person atje dhe i vetmi që del. Mund ta shihni.”