Ukraina ka sulmuar një depo të madhe të naftës në portin rus të Novorossiysk, duke shkaktuar dëme të konsiderueshme infrastrukturore dhe një zjarr të madh që vazhdoi të digjej edhe të premten në mëngjes.
Sipas një burimi nga Shërbimi i Sigurisë së Ukrainës, janë goditur cisterna nafte, stacione pompimi dhe sisteme të mbrojtjes ajrore.
Presidenti Volodymyr Zelensky konfirmoi përdorimin e raketave të prodhimit vendas me rreze të gjatë veprimi, duke e quajtur sulmin “përgjigje të justifikuar ndaj terrorit rus”.
Autoritetet ruse pohojnë se fragmentet e dronëve ukrainas shkaktuan plagosjen e katër personave dhe dëmtimin e disa ndërtesave banimi në Novorossiysk, ku është shpallur gjendje e jashtëzakonshme.
Ndërkohë, Kievi pati një natë tjetër të rëndë sulmesh ajrore ruse. Të paktën gjashtë persona u vranë dhe dhjetëra u plagosën, mes tyre një çift i moshuar, thanë autoritetet ukrainase. Dy persona të tjerë humbën jetën në një sulm në qytetin bregdetar Chornomorsk.
Shërbimi Federal i Sigurisë i Rusisë (FSB) pretendoi se ka parandaluar një atentat ndaj një zyrtari të lartë rus, duke akuzuar Ukrainën për planifikimin e sulmeve të tjera brenda territorit rus. Kievi i cilësoi akuzat “lajme të rreme”.