Kreu i Partisë “Mundësia”, Agron Shehaj ka reaguar pasi Adriatik Lapaj e ka paditur në SPAK për shpifje.
Gjatë një interviste në News 24, Shehaj u shpreh se Lapaj refuzon të dalë në debate publike pasi e denoncoi si sekser i vjehrrit të tij në Gjykatën e Sarandës.
Sipas Shehajt, nuk është një rast, por disa raste ku emri i Adriatik Lapaj del në pah në çështje të regjistrimit të pronave.
Kryetari i Partisë Mundësia thekson se Lapaj po vepron me të njëjtat skema, siç kanë bërë politikanët e tjerë kur u ka plasur skandali i korrupsionit.
“Zoti Lapaj do bënte mirë përveç se të shkonte në Gjykatë dhe të më kallëzonte në SPAK, do bënte mirë dhe të shpjegonte opinionin publik se si është e mundur që emri i tij përfshihet dhe përmendet. Është në regjistrim pronash, është mbrojtës i përfituesve që kanë përfituar nga vendimet e vjehrrit të tij. Por, sidoqoftë, Adriatik Lapaj nuk ka bërë gjë tjëtër, por është sjellë si çdo politikan tjetër, të cilit i ka dalë boja dhe është përfshirë në afera korruptive, gjëja e parë që ka bërë kanë akuzuar atë që ka thënë të vërtëtën për shpifje. Këtë e ka bërë Adriatik Lapaj, e ka bërë Gjiknuri, e ka bërë Xhaçka, e ka bërë Beqja, e ka bërë Saimir Tahiri. Nuk ka politikan të korruptuar shqiptar, që gjëja e parë që ka bërë kur ka plasur skandali dhe i ka dalë boja, ka vajtur dhe ka bërë kallëzim për shpifje. Nuk është një rast, po në fakt Adriatik Lapaj përmendet në disa raste ku prona është dhënë nga Gjykata e Srandës ku vjehrri i tij ishte kryetari i gjykatës dhe raste ku vendimi është marrë nga vjehrri”, tha Shehaj.
Sipas Shehajt, Lapaj po përdor një kallëzim në Gjykatë për të zvarritur çështjen.
“Nuk ka asnjë dyshim. Adriatiku nuk është as i pari dhe as i fundit, që më kallëzon për shifje. Në tëtë vjet kam denoncuar lloj lloj skandali. Shteti shqiptar ka rikuperuar miliona euro falë denoncimeve të mia dhe më kanë çuar në gjykatë edhe përpara, por kanë humbur gjithmonë dhe Adriatiku po bën të njëjtën gjë që kanë bërë të tjerët. Normal që do shkoj, çfarë dyshimi ka. Unë e ftoj, që mos të presim vite. Unë e ftoj Adriatikun të vijë. Këto janë letra, janë fakte. Të vijë këtu, në këtë televizion, dhe ju keni emision debati me Eni Vasilin që bëhet dhe të dali të shpjegojë, t’u shpjegojë qytetarëve, nëse është normale pastaj ta vendosin qytetarët’’, tha ai.