Komisioni Evropian u kërkon vendeve anëtare të presin miratimin e rregullave të përbashkëta në nivel BE-je. Projektligji i ri parashikon kufizime për përdorimin e rrjeteve sociale nga të miturit nën 13 vjeç.
Komisioni Evropian ka vendosur të pezullojë për një periudhë njëvjeçare nismat ligjore kombëtare që synojnë kufizimin e aksesit të fëmijëve në rrjetet sociale, duke u kërkuar shteteve anëtare të presin miratimin e rregullave të përbashkëta në nivel të Bashkimit Evropian.
Vendimi u bë i ditur gjatë konferencës së përditshme për shtyp të Komisionit në Bruksel. Ai synon t’i hapë rrugë propozimit të njohur si “EU Kids Act”, i cili parashikon ndalimin e përdorimit të rrjeteve sociale për fëmijët nën moshën 13 vjeç në të gjitha vendet e BE-së.
Zëdhënësi i Komisionit Evropian për çështjet digjitale, Thomas Regnier, deklaroi se ekzekutivi evropian ka vendosur të “shtyjë për 12 muaj çdo projektligj kombëtar që mbivendoset me rregullat e ardhshme të harmonizuara”.
Sipas tij, vendosja e kufijve të ndryshëm të moshës nga shtetet anëtare do të rrezikonte fragmentimin e tregut të përbashkët dhe do ta vështirësonte zbatimin e rregullave nga platformat digjitale.
Regnier nuk bëri të ditur listën e plotë të vendeve të prekura nga ky vendim, por përmendi Austrinë, e cila në korrik kishte dërguar në Bruksel për shqyrtim planin e saj për ndalimin e rrjeteve sociale për fëmijët nën 14 vjeç. Sipas Agence Europe, nga pezullimi pritet të preken edhe projektligjet e njoftuara nga Belgjika dhe Portugalia.
Vendimi ka shkaktuar reagime në Vjenë. Sekretari austriak i Shtetit për Digjitalizimin, Alexander Pröll, deklaroi për Politico se është e papranueshme që Brukseli të bllokojë nismat ligjore kombëtare pa paraqitur më parë një zgjidhje të plotë në nivel evropian.
Megjithatë, jo të gjitha vendet anëtare janë prekur nga ky pezullim. Greqia, e cila planifikon të zbatojë ndalimin e rrjeteve sociale për personat nën 15 vjeç nga 1 janari 2027, përjashtohet nga vendimi, pasi shqyrtimi i ligjit të saj nga Komisioni përfundoi përpara se të paraqitej propozimi evropian.
Edhe Italia dhe Franca, të cilat i kishin njoftuar planet e tyre përpara muajit shtator, pritet të lejohen të vijojnë me nismat përkatëse, raportoi agjencia gjermane e lajmeve dpa. Megjithatë, sipas AFP-së, Komisioni Evropian i ka kërkuar Parisit të rishikojë tekstin e projektligjit.
Ky vendim shënon një qëndrim më të rreptë të Komisionit Evropian ndaj nismave kombëtare. Më 4 shkurt, pas njoftimit të Spanjës për planet e saj për ndalimin e rrjeteve sociale për fëmijët nën 16 vjeç, zëdhënësi Thomas Regnier paralajmëroi qeveritë se nuk mund të vendosin detyrime shtesë ndaj platformave, pasi kjo fushë është tashmë e rregulluar nga Akti për Shërbimet Digjitale (DSA).
Sipas propozimit “EU Kids Act”, të prezantuar më 17 shtator nga presidentja e Komisionit Evropian, Ursula von der Leyen, dhe zëvendëspresidentja ekzekutive Henna Virkkunen, fëmijët e moshës 13 deri në 15 vjeç do të mund të përdorin rrjetet sociale vetëm përmes llogarive të posaçme, të krijuara dhe të mbikëqyrura nga prindërit.
Ndërkohë, llogaritë e pavarura do të lejohen vetëm nga mosha 15 vjeç.
Propozimi duhet ende të negociohet dhe të miratohet nga Parlamenti Evropian dhe Këshilli i Bashkimit Evropian përpara se të marrë fuqi ligjore.
Sipas Agence Europe, pezullimi mund të zgjatet edhe me gjashtë muaj të tjerë, nëse Këshilli miraton ndërkohë qëndrimin e tij në lexim të parë.
Irlanda, e cila mban presidencën e radhës të Këshillit të BE-së, ka deklaruar se synon të përshpejtojë punën për këtë çështje. Nga ana tjetër, Thomas Regnier e cilësoi miratimin e “EU Kids Act” si prioritetin kryesor të Komisionit Evropian.