Franca ka pezulluar përdorimin e granatave tymuese nga policia gjatë protestave të nxënësve, pasi një 15-vjeçar humbi dorën gjatë një incidenti në qytetin e Lens.
Ministri i Brendshëm, Laurent Nuñez, tha se kishte kërkuar pezullimin e përdorimit të këtyre mjeteve deri në sqarimin e plotë të rrethanave të incidentit. Autoritetet pretendojnë se i mituri e kishte marrë granatën, e cila më pas shpërtheu, ndërsa protestuesit thonë se ajo ishte qëlluar drejtpërdrejt ndaj tij nga një efektiv policie.
Ngjarja ka shtuar kritikat për përdorimin e forcës nga policia ndaj protestuesve të mitur. Sipas autoriteteve franceze, gjatë protestave të së martës u arrestuan 488 persona dhe u plagosën 43 pjesëtarë të forcave të sigurisë.
Ndërkohë, mbi 500 shkolla në të gjithë vendin u mbyllën plotësisht ose pjesërisht. Ministri i Arsimit, Édouard Geffray, deklaroi se 24 shkolla janë dëmtuar rëndë nga zjarret apo vandalizmi dhe mund të qëndrojnë të mbyllura për disa javë, duke prekur rreth 30 mijë nxënës.
Protestat, që nisën në mes të shtatorit, janë përhapur nga nxënësit e shkollave të mesme te studentët, prindërit dhe sindikatat. Në disa qytete policia ka përdorur gaz lotsjellës dhe topa uji për shpërndarjen e turmave.
Autoritetet kanë hapur 18 hetime për të vlerësuar nëse përdorimi i forcës nga policia gjatë protestave ka qenë proporcional.
Kryeministri Sébastien Lecornu pritet t’i drejtohet vendit përmes një deklarate televizive, ndërsa protestat pritet të vijojnë edhe të enjten.