Një ditë pas takimit që kryeministri Edi Rama zhvilloi me shqiptarët në Athinë, socialistët janë vënë në lëvizje që në takimet e ardhshme të kreut të qeverisë me Diasporen të mbledhin sa më shumë njerëz.
Ditën e sotme, grupi parlamentar i PS zhvilloi mbledhjen e përjavshme ku kryetari Bledi Çuçi kishte edhe disa porosi për deputetët socialistë.
Çuçi kërkoi që deputetët të angazhohem maksimalisht në takimet e Ramës në Diasporë, në Milano dhe në Londër, në ditët në vijim, për të çuar njerëz.
“Të gjithë kolegët që kanë lidhje personale apo elektorale të angazhohen për takimin e radhës në Milano pas dy javësh. Ju kërkoj ta merrni me shumë impenjim“,- i urdhëroi Çuçi deputetët e PS.
Kryeministri Edi Rama do të jetë më 26 maj në Milano dhe më 2 qershor në Londër. Rikujtojmë se në lidhje me takimin në Athinë, kryeministri grek e quajti atë një vizitë të panevojshme, dhe se duhej bërë një një moment të dytë.
Takimi që përkonte edhe me 1 vjetorin e arrestimit të Fredi Belerit, ngjalli reagime të shumta në shtetin fqinj, ku disa prej politikanëve e kanë cilësuar një provokim që u bëhet qytetarëve grekë.
Por, gjatë fjalimit që mbajti për rreth një orë, kryeministri Rama u kujdes që të mos përmendte Fredi Belerin, një çështje që solli edhe tensione të marrëdhënieve mes dy vendeve.