Ministria e Brendshme e Spanjës njoftoi të premten se, sipas vlerësimeve të saj, më shumë se 40 mijë migrantë kanë hyrë në enklavën spanjolle të Ceutës, në Afrikën e Veriut, gjatë 24 orëve të fundit, duke kaluar nga Maroku si nëpërmjet detit ashtu edhe rrugëve tokësore.
Një burim i policisë spanjolle deklaroi se rreth 40 mijë migrantë kanë mbërritur në Ceuta gjatë ditëve të fundit, ndërsa kryeministri spanjoll, Pedro Sánchez, pritej të vizitonte enklavën.
Sipas të njëjtit burim, fluksi i migrantëve ka qenë i pandërprerë gjatë gjithë natës. “Njerëzit vazhduan të mbërrinin gjatë natës dhe ende po mbërrijnë edhe në orët e para të mëngjesit,” tha ai.
Autoritetet spanjolle bënë të ditur se do të përpiqen të kthejnë sa më shpejt personat që kanë hyrë në mënyrë të paligjshme, pavarësisht një vendimi gjyqësor që ka vendosur kufizime të reja mbi procedurat e ashtuquajtura të “refuzimit në kufi”, të cilat lejojnë dëbimin e menjëhershëm të migrantëve.
Ende nuk është e qartë se çfarë e ka shkaktuar këtë rritje të papritur të fluksit migrator nga Maroku.
Pamjet nga Ceuta tregonin migrantë të entuziazmuar që ecnin nëpër rrugët e qytetit, falënderonin policinë spanjolle dhe thërrisnin: “Mirupafshim Marok, përshëndetje Spanjë.”
Policia dhe Garda Civile në Ceuta ndërhynë shumë pak për të ndaluar hyrjet, megjithëse disa efektivë u përpoqën t’i drejtonin migrantët drejt qendrës lokale të pritjes.
Pasoja diplomatike
Ngjarjet në Ceuta kanë shkaktuar tashmë reagime në arenën diplomatike.
Italia kërkoi të enjten pezullimin e Spanjës nga zona Schengen, duke argumentuar se situata në Ceuta përbën një rrezik për kufijtë e hapur evropianë. Në përgjigje, Spanja thirri ambasadorin italian dhe akuzoi Romën se po e shfrytëzon krizën për përfitime politike.
Po ashtu, dy zyrtarë të lartë të administratës së presidentit amerikan Donald Trump ripërsëritën qëndrimet e tyre kundër emigracionit, duke shpërndarë video nga ngjarjet në Ceuta.
Ndërkohë, qindra migrantë që kishin hyrë në mënyrë të parregullt në Ceuta nisën të kthehen drejt Marokut përmes të njëjtit digëmbrojtës që ndan qytetin autonom nga territori maroken. Ata po shoqërohen nga ushtria për të gjetur rrugën e kthimit.
Franca forcon kontrollet kufitare
Ministri i Brendshëm i Francës, Laurent Nuñez, deklaroi të premten se kontrollet në kufirin me Spanjën do të forcohen.
“Duke marrë parasysh situatën në enklavën e Ceutës, mbrëmë dhashë udhëzime për të rritur menjëherë kontrollet në kufirin spanjoll. Gjithashtu, kam angazhuar Forcën e Ndërhyrjes së Shpejtë Kufitare për të kryer kontrolle të hollësishme,” tha ai.
Autoritetet spanjolle: “Jemi plotësisht të tejmbushur”
Sipas gazetës El Mundo, autoritetet spanjolle kanë deklaruar se janë “plotësisht të tejmbushura” nga situata. Në momentin kur nisi fluksi i migrantëve, në vijën e parë ndodheshin vetëm 55 efektivë.
David Gómez, sekretar i komunikimit i Shoqatës Profesionale të Drejtësisë për Gardën Civile, deklaroi për El Mundo se numri i forcave në terren ishte “tre deri në katër herë më i ulët se sa do të nevojitej për të përballuar një situatë të tillë”.
Ky është fluksi më i madh i migrantëve drejt Ceutës që nga viti 2021. Shumica e të ardhurve janë burra të rinj dhe adoleshentë. Sipas të dhënave të publikuara të premten, të paktën 18 persona kanë humbur jetën gjatë kalimit.
Me ardhjen e rreth 40 mijë migrantëve, popullsia e Ceutës është rritur me afro 50 për qind, pasi enklava numëron rreth 83 mijë banorë.