Prokuroria e Posaçme Kundër Korrupsionit dhe Krimit të organizuar ka pezulluar hetimet për fraksionin e dosjes të njohur si “Xibraka”.
Sipas SPAK, nga hetimet, rezulton se nuk ka asnjë provë që lidh vëllain e kryeministrit Edi Rama, Olsi Ramën me personat që janë dënuar me herët për këtë çështje.
“Nga hetimet ka rezultuar se nuk ekzistojnë prova apo fakte që të lidhin shtetasin Ols Rama me aktivitetin kriminal, për të cilin janë dënuar më parë disa individë. Gjithashtu, nuk janë identifikuar autorë të tjerë të mundshëm për veprat penale në fjalë”, thekson SPAK.
Prokuroria e Posaçme rifilloi hetimet për ‘Xibrakën” pas referimit të Gazment Bardhit, i cili pretendoi se kishte prova pë përfshirjen e Olsi Ramës në veprimtari të paligjshme.
Më tej, SPAK ndonëse për Olsi Ramën e ka një përgjigje të qartë se ai nuk është i përfshirë, për personat e tjerë dosja i është dërguar Policisë së Shtetit për të vijuar punën në identifikimin e autorëve të tjerë, të pretenduar si të përfshirë në këtë rast.
Njoftimi i plotë i SPAK:
Prokuroria e Posaçme kundër Korrupsionit dhe Krimit të Organizuar ka përfunduar hetimet për procedimin penal nr. 88 të vitit 2024, të regjistruar pas rifillimit të hetimeve të pezulluara të procedimit penal nr. 335/1 të vitit 2016. Ky procedim lidhej me veprat penale të “Prodhimit dhe shitjes së narkotikëve”, “Trafikimit të narkotikëve”, dhe “Kryerjes së veprave penale nga grupet e strukturuara kriminale”, të parashikuara në nenet përkatëse të Kodit Penal.
Hetimet rifilluan pas administrimit të një informacioni të dërguar nga deputeti Gazment Bardhi, i cili pretendoi përfshirjen e shtetasit, Ols Rama në veprimtari të paligjshme. Në kuadër të këtyre hetimeve, SPAK ka kryer një sërë veprimesh hetimore, përfshirë bashkëpunimin me autoritetet kompetente të Kosovës.
Nga hetimet ka rezultuar se nuk ekzistojnë prova apo fakte që të lidhin shtetasin Ols Rama me aktivitetin kriminal, për të cilin janë dënuar më parë disa individë. Gjithashtu, nuk janë identifikuar autorë të tjerë të mundshëm për veprat penale në fjalë.
Në përputhje me nenin 326 të Kodit të Procedurës Penale, më datë 23 dhjetor 2024, është vendosur pezullimi i hetimeve për procedimin penal nr. 88 të vitit 2024, pasi autorët e tjerë të veprave penale nuk janë identifikuar. Dosja i është dërguar Drejtorisë së Përgjithshme të Policisë së Shtetit për të vijuar përpjekjet për identifikimin e autorëve.