Një 41-vjeçar është arrestuar ditën e sotme në aeroportin e Rinasit, pasi akuzohet se është pjesëtar i një grupi kriminal të përfshirë në prostitucion.
Mësohet se në pranga ka rënë Auron Hasani, i cili në fakt ka dhe 4 emra të tjerë, konkretisht, Auron Samurri, Auron Ajdinaj, Avni Ajdinaj dhe Elvis Ajdinaj. Hasini është dënuar në Itali nga Gjykata e Milanos me 4 vite, 2 muaj dhe 26 ditë burgim, pasi ai ishte pjesëtar i një grupi kriminal që shfrytëzonte për prostitucion vajza të huaja, në peridhën 2008-2012 në shtetin italian.
41-vjeçari duhet të vuajë ende dhe 3 vjet, 11 muaj e 11 ditë burgim dhe për këtë pritet të ekstradohet drejt Italisë.
Njoftimi i policisë:
Finalizohet operacioni policor i koduar “Identitetet”, si rezultat i bashkëpunimit ndërmjet Komisariatit të Policisë Rinas, Interpol Tiranës dhe homologëve italianë. Pjesëtar i një grupi kriminal që shfrytëzonte për prostitucion shtetase të huaja gjatë periudhës 2008-2012 në Milano, ndalohet në hyrje 41-vjeçari.
41-vjeçari u ndalua me qëllim ekstradimin në Itali, ku është dënuar me mbi 4 vjet burgim, për këtë veprimtari kriminale.
Si rezultat i kontrolleve dhe intervistimeve të detajuara në hyrje/dalje dhe shkëmbimit të informacioneve të siguruara nga to, ndërmjet shërbimeve të Interpol Tiranës dhe homologëve italianë, u finalizua operacioni policor i koduar “Identitetet”, gjatë të cilit shërbimet e Komisariatit të Policisë Rinas ndaluan në hyrje të vendit, shtetasin e shpallur në kërkim ndërkombëtar:
-Auron Hashani alias Auron Samurri alias Auron Ajdinaj alias Avni Ajdinaj alias Elvis Ajdinaj, 41 vjeç.
Gjykata e Milanos e ka dënuar 41-vjeçarin, me 4 vjet, 2 muaj e 26 ditë burgim, për veprën penale “Shfrytëzimi i prostitucionit”, kryer në kuadër të grupit kriminal, sipas parashikimeve të Kodit Penal të Italisë. Ky shtetas, në bashkëpunim me shtetas të tjerë, ka shfrytëzuar për prostitucion në Milano, 2 shtetase të huaja.
Vijojnë procedurat për ekstradimin e këtij shtetasi, në Itali, ku i duhet të vuajë dhe 3 vjet, 11 muaj e 11 ditë burgim.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.