Qeveria gjermane ka shpenzuar 64,677 euro për shërbime stilimi flokësh dhe grimi për ish-kancelaren Angela Merkel, që nga qershori i vitit 2024.
Kjo bëhet e ditur nga informacionet zyrtare të publikuara së fundmi, në përgjigje të një interpelance parlamentare.
Të dhënat janë dhënë pas një kërkese nga një deputet i Alternative for Germany (AfD), ndërsa detajet janë shpërndarë edhe për mediat si Junge Freiheit dhe Apollo News.
Nga kjo shumë totale, 36,354 euro janë shpenzuar vetëm gjatë vitit 2025, që përkthehet në rreth 3,000 euro në muaj mesatarisht për shërbime estetike.
Kancelaria Federale ka argumentuar më herët se këto janë “shpenzime të domosdoshme”, të lidhura me kryerjen e “detyrave zyrtare në vijim” nga ish-kancelarët. Këtu përfshihen daljet publike, angazhimet ndërkombëtare dhe detyrimet e tjera pas përfundimit të mandatit.
Gjithashtu, janë mbuluar edhe kostot e udhëtimit dhe akomodimit për stilistin personal që shoqëron Merkelin.
Ndërkohë, në kontrast me Merkelin, pasardhësi i saj Olaf Scholz nuk ka gjeneruar shpenzime të ngjashme gjatë të njëjtës periudhë.
Këto shifra i shtohen edhe shpenzimeve të raportuara më herët. Në vitin 2023 u bë e ditur se shpenzimet për stilimin e Merkel pas largimit nga detyra kishin arritur në rreth 55,000 deri në 57,000 euro që nga dhjetori i vitit 2021, me rreth 37,000–39,780 euro vetëm për vitin 2022.
Në total, kur kombinohen të gjitha këto shifra, shpenzimet për flokë dhe grim tejkalojnë tashmë 100 mijë euro, duke e bërë Merkel ish-kancelaren më të kushtueshme për buxhetin federal deri më sot.
Nga këto llogari përjashtohen shpenzimet për zyra, automjete zyrtare dhe truprojat.
Nga ana tjetër, Shoqata e Tatimpaguesve ka shprehur vazhdimisht shqetësim, duke theksuar se këto shpenzime janë të vështira për t’u justifikuar për qytetarët e zakonshëm, të cilët paguajnë vetë për shpenzimet personale.
Presidenti i saj, Reiner Holznagel, ka kërkuar që këto kosto të reduktohen në minimum dhe, kur është e mundur, të mbulohen privatisht nga vetë politikanët.
Në të kaluarën, Kancelaria gjermane kishte refuzuar të publikonte shifra të sakta, duke u justifikuar me mbrojtjen e të drejtave personale, sekretet tregtare dhe konfidencialitetin e kontraktorëve që ofrojnë shërbimet e grimit dhe stilimit.