Shefi ekzekutiv i kompanisë ajrore Ryanair, Michael O’Leary, ka sulmuar ashpër presidentin amerikan Donald Trump, duke e quajtur “gënjeshtar” dhe “historikisht gabim” në lidhje me disa nga çështjet më të rëndësishme gjeopolitike që po përballon bota në vitin 2026.
Në një intervistë për Politico, O’Leary kritikoi qëndrimin e Trump ndaj luftës në Ukrainë, politikave tregtare dhe tarifave, duke e cilësuar atë si të dëmshëm për stabilitetin global. Deklaratat e tij përbëjnë një rast të rrallë të kritikave të hapura nga bota e korporatave ndaj presidentit amerikan, të cilat zakonisht shmangin përplasjet me Shtëpinë e Bardhë.
“Trump është historikisht gabim për Ukrainën dhe Rusinë, është historikisht gabim për tarifat,” tha O’Leary, duke pranuar megjithatë se presidenti ka të drejtë kur kritikon vendet evropiane për mungesë angazhimi në mbrojtje.
O’Leary shtoi se, ndonëse do ta konsideronte veten “republikan natyral” po të ishte amerikan, ai nuk do të mbështeste kurrë një parti të udhëhequr nga Trump.
“Nuk kam asnjë besim apo besueshmëri te Trump, i cili është dëshmuar vazhdimisht si gënjeshtar,” u shpreh ai.
Shefi i Ryanair, i njohur për gjuhën e drejtpërdrejtë dhe kritikat ndaj burokracisë evropiane, tha se kërcënimet e dyfishta nga Rusia dhe politika e Trumpit duhet ta shtyjnë Evropën të heqë taksat dhe rregulloret që, sipas tij, po dëmtojnë konkurrueshmërinë.
Ai theksoi se Bashkimi Evropian duhet të mbrojë tregun e përbashkët, të cilin e cilësoi si arritjen më të madhe të BE-së. “Jam një mbështetës i madh i tregut të përbashkët evropian – është suksesi më i madh i jetës sime,” deklaroi O’Leary në Bruksel.
Sipas tij, tre arritjet kryesore të BE-së janë: udhëtimet ajrore me kosto të ulët, heqja e tarifave të roaming-ut dhe programi Erasmus, i cili ka afruar të rinjtë evropianë.
O’Leary sulmoi gjithashtu planet për rritjen e taksave dhe rregulloreve, duke përfshirë propozimin e Belgjikës për rritjen e taksës së aviacionit dhe nismat e Parlamentit Evropian për zgjerimin e të drejtave të pasagjerëve.
Ai e quajti Parlamentin Evropian “një klub idiotësh që vetëm sa shpik dhe imponon më shumë kosto për qytetarët evropianë”.
Si reagim ndaj rritjes së taksës së aviacionit, Ryanair njoftoi se do të shkurtojë një milion vende në aeroportin Charleroi të Brukselit në vitin 2026 dhe një milion të tjera në vitin 2027, duke reduktuar edhe numrin e avionëve në bazë.
O’Leary kërkoi që sistemi evropian i tregtimit të emetimeve (ETS) të aplikohet edhe për fluturimet ndërkontinentale drejt SHBA-së, Azisë dhe vendeve të Gjirit, duke argumentuar se aktualisht po ndëshkohen vetëm fluturimet brenda BE-së.
Megjithatë, ai pranoi se një masë e tillë do të shkaktonte përplasje me SHBA-në dhe shtoi se kjo “nuk do të ndodhë kurrë sa kohë që Trump është në Shtëpinë e Bardhë”.