Sekretari amerikan i Shtetit, Marco Rubio njoftoi se pas një rishikimi 6 vjavor se administrata e Donald Trump ka vendosur të mbyllë 83% të programeve të ofruara nga Agjencia e Shteteve të Bashkura për Zhvillim Ndërkombëtar (USAID).
Këtë vendim, Rubio e njoftoi në platformën e tij sociale “X”.
Më tej, ai theksoi se pjesa e mbetur e programeve të USAID që do të vijojnë, do të jenë nën monitorim dhe do të administrohen nga Departamenti i Shtetit.
Ai ka falënderuar punën e bërë nga stafi i Departamentit të Efikasitetit të Elon Musk për punën e bërë dhe auditin e kryer në USAID.
“Pas një rishikimi 6-javor, ne po anulojmë zyrtarisht 83% të programeve në USAID. 5,200 kontratat që tani janë anuluar shpenzuan dhjetëra miliarda dollarë në mënyra që nuk i shërbenin (dhe në disa raste edhe dëmtonin) interesat thelbësore kombëtare të Shteteve të Bashkuara. Në konsultim me Kongresin, ne synojmë që 18% e mbetur e programeve që po mbajmë (afërsisht 1,000) tani të administrohen në mënyrë më efektive nën Departamentin e Shtetit. Faleminderit DOGE dhe stafit tonë punëtor që punuan me orë të tëra për të arritur këtë reformë të vonuar dhe historike”, shkruan ai.