Rusia ka ndërmarrë një sulm masiv ajror ndaj Kievit gjatë natës, vetëm pak orë para takimit të planifikuar mes presidentit të Ukrainës, Volodymyr Zelensky, dhe presidentit amerikan Donald Trump, që pritet të mbahet të dielën në Florida.
Sipas autoriteteve lokale, nga sulmi u plagosën të paktën tetë persona, ndërsa shpërthime dhe zjarre u raportuan në disa zona të kryeqytetit ukrainas. Shërbimet e emergjencës njoftuan se u goditën ndërtesa banimi dhe objekte civile, duke detyruar evakuimin e banorëve.
Zelensky ka deklaruar se plani 20-pikësh i paqes i hartuar nga Ukraina dhe SHBA është “90 për qind gati” dhe se synon të diskutojë me Trump për garancitë e sigurisë për Ukrainën. Megjithatë, ai ka pranuar se nuk ka ende garanci për një marrëveshje përfundimtare.
Duke komentuar sulmet, analistë ukrainas thanë se veprimet e Rusisë tregojnë mungesë vullneti për paqe. “Nga ajo që po ndodh, shihet qartë se Moska nuk është e interesuar për përfundimin e luftës,” u shprehën ata.
Si pasojë e situatës, Polonia ngriti avionë luftarakë dhe mbylli përkohësisht dy aeroporte në juglindje të vendit, për arsye sigurie.
Takimi Trump–Zelensky shihet si një përpjekje kyçe për të çuar përpara negociatat për përfundimin e luftës, e cila ka hyrë në vitin e katërt.