Konferenca e Kryetarëve miratoi vetëm me votat e socialistëve ngritjen e Komisionit të Posaçëm Parlamentar, me fokus koordinimin dhe mbikëqyrjen e përpjekjeve institucionale, për të luftuar dezinformimin dhe format e tjera të ndërhyrjes së huaj në proceset demokratike në Shqipëri.
Ishte kreu i grupit parlamentar të PS Bledi Çuçi, që propozoi për ngritjen e këtij komisioni.
Ndërkohë kreu i grupit parlamentar të PD, Gazment Bardhi kërkoi më shumë kohë dhe po ashtu të shtyhej miratimi i ngritjes së këtij komisioni, pasi çështja është sensitive dhe duhet të trajtohet me kujdes. Por kërkesa e tij nuk u mor parasysh nga socialistët, të cilët votuan pro ngritjes së këtij komisioni.
“Kjo çështje është sensitive dhe duhet të trajtohet me kujdes të veçantë. Ne bashkëndajmë shqetësimin për ndërhyrjet e shteteve të treta jo partnere nëpërmjet të gjitha formave. Mirëpo, do duhet që ju të qartësoni iniciativën, të na informoni ne dhe gjithë publiku mbi çfarë do të bëjë dhe për çfarë po kërkohet.
Flisni për marrëveshje ndërkombëtare, marrëveshje me SHBA, dhe ne nuk dimë asgjë për atë marrëveshje pasi nuk na e keni vënë në dispozicion, edhe pse Kushtetuta e detyron qeverinë të na vendos në dijeni. Këto çështje që pretendohen të trajtohen në ketë komision të posaçëm mund të trajtohen fare mire ne komisionet respektive, Komisionin e Medias apo Komisionin e Sigurisë. Pse nuk mund të trajtohen aty? Do duhet të hiqet çdo dileme për ndërhyrje në lirinë e medias. Nëse nuk është ky qëllimi i fshehur, duhet të marrin kohën e nevojshme dhe mos e trajtojmë si një temë për konsum ditor.
Ka një Rezolutë të Kuvendit në 2019, e miratuat dhe e harruat. E trajtuat si temë dite dhe aq. Aty përcaktohet detyrimi që institucionet e sigurisë të sjellin raport në Kuvend, gjë që nuk e kanë bërë. Duhet të konsultohemi me shoqatat e medias, që qartësohet objekti dhe motivet, çfarë do të trajtojë dhe pse duhet.’- tha Bardhi.