Qeveria britanike po shqyrton mundësinë e paraqitjes së një projektligji për të larguar Prince Andrew nga radha e trashëgimisë së fronit mbretëror, një veprim që do ta pengonte përfundimisht të bëhej mbret.
Ministri i Mbrojtjes, Luke Pollard, deklaroi për BBC se ky do të ishte “veprimi i duhur”, pavarësisht rezultatit të hetimeve policore në vijim. Ai konfirmoi se qeveria ka punuar me Buckingham Palace për të shqyrtuar këtë hap, por theksoi se çdo vendim duhet të merret pas përfundimit të hetimeve.
Andrew, vëllai i mbretit Charles III, aktualisht renditet i teti në linjën e trashëgimisë, megjithëse vitin e kaluar iu hoqën titujt mbretërorë pas presionit publik për lidhjet e tij me financierin e dënuar për pedofili Jeffrey Epstein. Ai u arrestua dhe më pas u lirua nën hetim për dyshime për shpërdorim detyre, akuza që i ka mohuar vazhdimisht.
Propozimi i qeverisë vjen pasi disa deputetë, përfshirë nga Liberal Democrats dhe Scottish National Party, kanë shprehur mbështetje për një ligj të tillë. Megjithatë, disa parlamentarë laburistë janë shprehur skeptikë, duke argumentuar se gjasat që Andrew t’i afrohet fronit janë shumë të vogla.
Ndryshimi i linjës së trashëgimisë kërkon miratimin e Parlamentit dhe pëlqimin e 14 vendeve të Komonuelthit ku Charles III është kreu i shtetit, përfshirë Kanadanë, Australinë dhe Zelandën e Re. Herën e fundit që një person u hoq nga linja e trashëgimisë me akt parlamentar ishte në vitin 1936, pas abdikimit të Edward VIII.
Pallati Buckingham nuk ka komentuar publikisht mbi planet e qeverisë, ndërsa hetimet policore pritet të vazhdojnë edhe në ditët në vijim.