Është arrestuar nga policia administratori i minierës në Bulqizë, ku një ditë më parë një minator humbi jetën, teksa tjetri u plagos rëndë.
Bëhet me dije nga njoftimi i policisë se në flagrancë është arrestuar 38-vjeçari Gentjan Peshku, i cili akuzohet për “Shkeljen e rregullave të mbrojtjes në punë”.
“Nga hetimet rezultoi se për shkak të shkeljes së rregullave, brenda në galeri është shembur një masiv gurësh, i cili ka zënë këta 2 shtetas.“- citon policia ndër të tjera.
NJOFTIMI I POLICISË:
Bulqizë
Në përfundim të veprimeve hetimore dhe procedurale, të kryera menjëherë pas ngjarjes së ndodhur ditën e djeshme, në një galeri kromi, në fshatin Thekën, Martanesh, ku gjatë procesit të punës, humbi jetën shtetasi A. P., 29 vjeç dhe u dëmtua rëndë shtetasi H. B., 40 vjeç, të dy vagonistë në këtë galeri, ju bëjmë me dije se:
Komisariati i Policisë Bulqizë arrestoi në flagrancë shtetasin G. P., 38 vjeç, banues në Bulqizë, me detyra administrator dhe brigadier në subjektin minerar.
Nga hetimet rezultoi se për shkak të shkeljes së rregullave të mbrojtjes në punë, brenda në galëri është shembur një masiv gurësh, i cili ka zënë këta 2 shtetas.
40-vjeçari vijon të jetë në kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme, për veprën penale “Shkelja e rregullave të mbrojtjes në punë”.