Taulant Balla ka filluar të jetë shumë aktiv në rrjetet sociale, duke komentuar çfarëdo ndodh në Shqipëri dhe jo vetëm.
Madje, arriti sa të gjobisë nëpërmjet postimit edhe tik-tokerin e njohur, Kozakun, duke e akuzuar këtë të fundit se kishte ndotur detin.
Ndërkohë, prej dy ditësh nuk ka asnjë reagim nga Taulant Balla në lidhje me dhunën e ushtruar nga rojet private ndaj qytetarëve në Zvërnec.
Ish-ministri i Brendshëm, që Rama e shkarkoi pa mbushur 1 vit në detyrë, me arsye që edhe sot e kësaj dite mbeten enigmë, ka zgjedhur të publikojë foto nga martesa e Dua Lipës, nga Festa e Qershive në Elbasan dhe deri te shpallja e Egnatias kampion e e Shqipërisë në futboll, por ka kyçur gojën për atë që ndodhi në Zvërnec.
Me shumëllojshmërinë e postimeve, Taulant Balla po mundohet të kopjojë Erion Braçen, që njihet për reagimet e tij ndaj çdo ngjarje, por të paktën ky i fundit bën ndonjëherë edhe opozitarin, dhe jo vartësin e bindur ndaj kryetarit të partisë.
