Jemi mësuar që ish-pushtetarët t’i shikojmë të jetojnë në luks edhe shumë vite pas tërheqjes nga detyra, për shkak të korrupsionit të kryer ndër vite, ku me paratë e qytetarëve kanë mbushur llogaritë e tyre bankare.
Por, ka edhe nga ata që i kanë shërbyer vendit dhe qytetarëve me ndershmëri, e një prej tyre duket të ketë qenë Robert Kotmillo, ish-kryebashkiaku i Korçës në nga viti 1996 deri në vitin 2000.
Sot, ai ka ndërruar jetë, në varfëri dhe në vetmi, në banesën e tij të vjetër, e cila gjendet mes disa të tjerave të mirëmbajtura e të bukura.
Robert Kotmillo ka patur prej vitesh detyra drejtuese, pasi për 29 vite drejtoi Ndërmarrjen e frigoriferëve në Korçë, e më pas kryetar i Këshillit Bashkiak, për ta mbyllur me detyrën si kryetar i Bashkisë Korçë.
Jeta e privoi nga krijimi i familjes, ndaj edhe vitet e fundit i kaloi i vetëm, duke u kujdesur për macet e duke lexuar libra. Në intervistën e fudnit në Euronews Albania, tregoi se ushqimin e siguronte nga një fondacion në Korçë, teksa foli edhe për situatën politike shqiptare.
“Më vjen keq kur dëgjoj se gjashtë kryetarë bashkie dhe katër ministra janë në burg. Është e rëndë që persona të tillë, të cilët përfundojnë pas hekurave, të kenë qenë në krye të bashkive apo institucioneve drejtuese të vendit. Shumë e rëndë,” thoshte ai.
Sigurisht, ka qenë e rëndë për një njeri që ka punuar me ndershmëri, të shikojë si pasardhësit e tij në detyrë të grabisin e të burgosen. Por, edhe pse nuk fitoi pasuri, fitoi respektin e qytetarëve.
Janë të paktëpolitikanët që mbahen mend për ndershmëri. Robert Kotmillo është një prej tyre!