Deputeti i Partisë Mundësia, Erald Kapri ka ngritur zërin dje në Parlament lidhur me një shqetësim serioz që kanë një komunitet prindërish, fëmijët e të cilëve vuajnë nga fribroza cistike dhe torturohen për të siguruar mjekimin jashtë vendit dhe me kosto të mëdha, për shkak se në Shqipëri mungon.
Kapri ka lexuar në foltore mesazhin e një nëne e cila i është drejtuar për ndihmë duke i kërkuar që të ngrejë shqetësimin dhe ministria e Shëndetësisë të reagojë. Bëhet fjalë për një medikament që fëmijët e prekur nga fibroza cistike e kanë të domosdoshëm për të marrë frymë më me lehtësi. Ky mjekim në vendin tonë nuk ekziston dhe prindërit e blejnë kontrabandë.
“Djali im dhe të tjerët si ai me fibrozë cistike po mbyten në heshtje. Në Shqipëri nuk kanë asnjë lloj mjekimi, as gjërat më fillestare, ndërkohë që në të gjithë Ballkanin fëmijët marrin Trikafta-n, pra ilaçin. Ky ilaç është shpallur nga OBSH si esencial për jetën, por në vendin tonë ai mbetet një ëndërr e pamundur” u shpreh Kapri.
Në mesazhin që lexoi deputeti i “Mundësia”, nëna rrëfente se lidhur me mungesën e medikamentit, prej vitesh i është drejtuar Ministrisë së Shëndetësisë që të marrë zgjidhje, por më sot përpjekjet kanë rezultuar të kota.
“Një nënë sheh fëmijën e saj që nuk merr dot frymë… dhe e di që shpëtimi ekziston, por i mohohet. Prindërit detyrohen ta blejnë ilaçin kontrabandë, me çmime të papërballueshme”, thekson Kapri.
“Ju lutem, bëjeni këtë kauzë dhe në Parlament ngrijeni zërin për jetën e shumë fëmijëve që po shuhen sepse nuk kanë as mjetet më bazë për të marrë frymë”, ishte lutja e nënës e cila kërkon që zëri i saj dhe shumë prindërve të tjerë të dëgjohet dhe të marrin një zgjidhje.
Fjala e Erald Kaprit:
Dua ta nis me mesazhin e një nëne. Ja çfarë më shkruan ajo.
Po ju drejtohem si një nënë që çdo natë dëgjon frymëmarrjen e vështirë të djalit të saj dhe lutet që dita pasardhëse ta gjejë me jetë. Ju kërkoj me përulje që ky zë të thuhet në Parlament.
Djali im dhe të tjerët si ai me fibrozë cistike po mbyten në heshtje. Në Shqipëri nuk kanë asnjë lloj mjekimi, as gjërat më fillestare, ndërkohë që në të gjithë Ballkanin fëmijët marrin Trikafta-n, pra ilaçin.
Ky ilaç është shpallur nga OBSH si esencial për jetën, por në vendin tonë ai mbetet një ëndërr e pamundur.
Nuk ka dhimbje më të madhe për një nënë sesa të shohë fëmijën që nuk mbushet dot me frymë, kur e di se shpëtimi ekziston por shteti ia mohon.
Ju lutem, bëjeni këtë kauzë dhe në Parlament ngrijeni zërin për jetën e shumë fëmijëve që po shuhen sepse nuk kanë as mjetet më bazë për të marrë frymë.
Zonja ministre, ju lutem t’ja përcillni ministres së Shëndetësisë, e cila nuk para vjen në Parlament. Nëna që më ka çuar këtë mesazh më ka thënë që kanë vite që ia kanë adresuar ministrisë së Shëndetësisë dhe nuk ka ende një përgjigje. Këta prindër me fëmijë të sëmurë detyrohen ta blejnë jashtë kontrabandë ilaçin shumë shtrenjtë ndërkohë që qeveria dhe ministria refuzon për ta futur në listë e për ta sjellë në Shqipëri, e për ta pasur të rimbursuar.