Suedia ka miratuar një ligj të ri për shtetësinë, duke e bërë më të vështirë për të huajt që të bëhen qytetarë suedezë.
Sipas rregullave të reja, që pritet të hyjnë në fuqi më 6 qershor, aplikantët do të duhet të kenë jetuar në Suedi për të paktën tetë vjet, nga pesë vjet që kërkoheshin më parë.
Gjithashtu, ata duhet të dëshmojnë të ardhura të qëndrueshme prej të paktën 22,000 krona në muaj (rreth 2,030 euro) para tatimit.
Kushtet e reja përfshijnë gjithashtu kritere më të rrepta mbi sjelljen kriminale dhe gjendjen financiare. Aplikantët nuk duhet të kenë precedentë penalë dhe as borxhe të papaguara.
Një tjetër kërkesë e rëndësishme është njohja e gjuhës suedeze dhe shoqërisë suedeze, e cila do të vlerësohet përmes një testi të detyrueshëm.
Partia Demokratët e Suedisë, e cila ka propozuar reformat, ka mbrojtur vendimin duke deklaruar se qëllimi është përmirësimi i politikave të migracionit. Sipas saj, ndryshimet synojnë të forcojnë sistemin e mirëqenies dhe sigurinë në vend.
Megjithatë, ligji i ri është kritikuar nga disa segmente politike dhe shoqërore si i padrejtë. Aktualisht, mbi 100,000 persona janë në pritje të vendimeve për shtetësi, ndërsa rregullat e reja do të zbatohen edhe për aplikimet e dorëzuara më parë.
Partitë opozitare, përfshirë Socialdemokratët, Partinë e Qendrës, të Majtën dhe të Gjelbrit, kanë kërkuar masa tranzitore për të zbutur ndikimin e menjëhershëm të ndryshimeve.
Ky zhvillim në Suedi vjen në një kohë kur shumica e vendeve të Bashkimit Europian, me përjashtim të Spanjës, po shtrëngojnë politikat e tyre të migracionit.