Prokuroria e Fierit ka dërguar për gjykim dosjen e 5 mjekëve të Spitalit Rajonal të Fierit, pasi neglizhuan trajtimin mjekësor të një pacienti, i cili ndërroi jetë.
Sipas Prokurorisë, Ledjusa Muhametaj, Enton Dore, Agim Sulaj, Aleks Sulejmani dhe Ndriçim Bala akuzohen për veprën penale, “Neglizhenca në trajtimin mjekësor”, pasi nuk i dhanë trajtimin e duhur mjekësor Bledar Sherifajt, i cili fatkeqësisht humbi jetën.
Njoftimi i Prokurorisë Fier:
Prokuroria Fier dërgon në gjyq pesë mjekë të Spitalit Rajonal për “Neglizhencë në trajtimin mjekësor”
Prokuroria pranë Gjykatës së Shkallës së Parë të Juridiksionit të Përgjithshëm Fier, ka përfunduar hetimet paraprake të çështjes penale nr.1437, viti 2022, dhe dërgon për gjykim 5 (pesë) të pandehur, mjekë të Spitalit Rajonal Fier, konkretisht të pandehurit L.V( M),E.D., A.S., A.S. dhe N.B., për veprën penale, “Neglizhenca në trajtimin mjekësor”, parashikuar nga neni 96 paragrafi i 2 Kodit Penal.
Nga provat e administruara dhe analizimi i tyre, ka rezultuar se pesë mjekët kanë neglizhuar në trajtimin mjekësor të shtetasit B.SH., i cili më pas ka ndërruar jetë.
Prokuroria Fier, është plotësisht e angazhuar për të ushtruar ndjekje penale dhe vënë para përgjegjësisë të gjithë funksionarët publikë që kryejnë vepra penale.