Pak ditë pasi Kuvendi miratoi projektligjin për pagat e magjistratëve, kryeministri Edi Rama fton për dialog më date 28 shtator institucionet e sistemit të drejtësisë.
Ftesa u është drejtuar Këshillit të Lartë Gjyqësor, Këshillit të Lartë të Prokurorisë, gjykatave, prokurorive të vendit dhe shoqatave të magjistratëve, ndërsa sipas kryeministrit Rama në tryezë do të jenë edhe përfaqësues të Këshillit të Europës.
Kryeministri, z.Edi Rama ju fton në një tryezë të përbashkët konsultimi, si pikënisje e një procesi të hapur konsultimi, dialogu dhe bashkërendimi ndërinstitucional, me synim diskutimin e përbashkët të parimeve dhe elementeve mbi të cilat mund të ndërtohet një mekanizëm i qëndrueshëm, koherent dhe i parashikueshëm për përcaktimin e pagave në sistemin e drejtësisë, sipas standardeve evropiane.
Diskutimi do të përqendrohet në identifikimin e parimeve, kritereve dhe instrumenteve që duhet të udhëheqin politikën e pagave, duke garantuar njëkohësisht qëndrueshmërinë buxhetore, koherencën ndërinstitucionale, proporcionalitetin ndërmjet funksioneve dhe përgjegjësive”, thuhet në letër.
Me tej, nënvizohet se “nëpërmjet këtij procesi konsultimi synohet të arrihet një qasje e përbashkët institucionale për një mekanizëm pagash që kontribuon në konsolidimin e pavarësisë, integritetin dhe profesionalizimin të sistemit të drejtësisë, duke siguruar rregulla të qarta dhe objektive për përcaktimin dhe rishikimin periodik të tyre”.
Ftesa u është dërguar:
Këshillit të Lartë Gjyqësor
Këshillit të Lartë të Prokurorisë
Gjykatës së Lartë
Prokurorisë së Përgjithshme
Gjykatës së Posaçme të Apelit kundër Korrupsionit dhe Krimit të Organizuar
Gjykatës së Posaçme të Shkallës së Parë kundër Korrupsionit dhe Krimit të Organizuar
Prokurorisë së Posaçme kundër Korrupsionit dhe Krimit të Organizuar
Gjykatës së Apelit të Juridiksionit të Përgjithshëm
Gjykatës Administrative të Apelit
Prokurorisë pranë Gjykatës së Apelit të Juridiksionit të Përgjithshëm
Gjykatave Administrative të Shkallës së Parë
Gjykatave të Shkallës së Parë të Juridiksionit të Përgjithshëm
Prokurorive pranë Gjykatave të Shkallës së Parë të Juridiksionit të Përgjithshëm
Forumit të Grave Gjyqtare Shqiptare
Unionit të Gjyqtarëve të Shqipërisë
Shoqatës Kombëtare të Gjyqtarëve të Republikës së Shqipërisë
Shoqatës së Prokurorëve të Republikës së Shqipërisë