Administrata e presidentit amerikan Donald Trump akuzoi Evropën se është një “inkubator” për terrorizmin, i ushqyer nga emigracioni masiv, në një strategji të re kundër terrorizmit të publikuar të mërkurën.
Strategjia fokusohet gjithashtu në eliminimin e “ekstremistëve të dhunshëm të majtë”, përfshirë grupet “radikalisht pro-transgjinorëve”, ndërsa administrata konservatore e Trump shton sulmet politike ndaj kundërshtarëve.
Ajo gjithashtu vendos kartelet e drogës në Amerikë në qendër të përpjekjeve kundër terrorizmit.
Megjithatë, disa nga deklaratat më të forta janë rezervuar për Evropën, shtëpi e shumë aleatëve të SHBA-së, të cilët pritet të shqetësohen nga fakti që kontinenti i tyre është sërish në shënjestër të administratës Trump.
“Është e qartë për të gjithë se grupe armiqësore të mirëorganizuara shfrytëzojnë kufijtë e hapur dhe idealet globaliste të lidhura me to. Sa më shumë të rriten këto kultura të huaja dhe sa më gjatë të vazhdojnë politikat aktuale evropiane, aq më shumë terrorizmi është i garantuar,” thuhet në strategji.
“Si vendlindja e kulturës dhe vlerave perëndimore, Evropa duhet të veprojë tani dhe të ndalojë rënien e saj të qëllimshme,” thuhet më tej në strategjinë e drejtuar nga koordinatori kundër terrorizmit Sebastian Gorka, i cili është akuzuar për lidhje me grupe të ekstremit të djathtë.
Kritikat e reja ndaj Evropës vijnë vetëm disa muaj pasi strategjia e re e sigurisë kombëtare e Trump deklaroi se kontinenti po përballet me “zhdukje qytetëruese” për shkak të emigracionit.
Trump ka kritikuar së fundmi edhe aleatët evropianë të NATO për mosmbështetjen e mjaftueshme në luftën e tij kundër Iranit.
Grupet e majta janë një shqetësim i madh për administratën e presidentit republikan, me strategjinë që synon ato që i quan “ekstremistë të dhunshëm të majtë, përfshirë anarkistët dhe antifashistët.”
Strategjia thotë se përpjekjet amerikane kundër terrorizmit do të “prioritizojnë identifikimin dhe neutralizimin e shpejtë të grupeve sekulare politike të dhunshme, ideologjia e të cilave është anti-amerikane, radikalisht pro-transgjinore dhe anarkiste.”
Ajo përmend në mënyrë specifike vrasësin e dyshuar të aleatit të Trump dhe influencuesit konservator Charlie Kirk, “nga një radikal që përkrahte ideologji ekstreme transgjinore.”
Që nga rikthimi i tij në pushtet vitin e kaluar, Trump ka demonizuar çdo njohje të diversitetit gjinor dhe personave transgjinorë.
Ai krenohet rregullisht se administrata e tij ka ndaluar gratë transgjinore të marrin pjesë në sportet e grave dhe, menjëherë pas inaugurimit, firmosi një urdhër ekzekutiv që shpallte se ekzistojnë vetëm dy gjini.