Ka nisur në Gjykatën e Posaçme gjyqi për dosjen Partizani, ku do të dëshmojë kreu i grupit të Partisë Socialiste, në cilësinë e kallëzuesit të çështjes.
Jashtë dyerve të GJKKO, Balla u shpreh se i qëndron kallëzimit të bërë ndaj kreut të PD Sali Berisha, për të cilin tha se ndërkohë që është në bankën e të akuzuarve, kjo konsiderohet si “Ditë e madhe për Shqipërinë”.
“Që nga viti 1912 Shqipëria s’ka qenë kurrë më afër Europës se sa sot, dhe arsyeja është reforma në drejtësi, që ka rikthyer besimin te drejtësia. Këta në bankën e të akuzuarit më kanë akuzuar mua për shpifje në 2012. Ky është rast tipik i korrupsionit të nivelit të lartë. 5 për qindshi është korrupsion. Unë do përgjigjem për çfarë të më pyesin, por i qëndroj kallëzimit tim”, tha Balla.
Po ashtu pritet që sot të dëshmojnë edhe 7 persona të tjere, konkretisht:
Afrim Tole Ish-shefi i Klubit Partizani
Isa Tare Ish drejtori i kompleksit
Bujar Labinoti Ish drejtori i kompleksit
Albert Xhani Ish presidenti i Partizanit
Paro Laçi Ish presidenti i Partizanit
Dhurata Çela Ish drejtoreshë e AKKP Tiranë
Petrit Kullolli Topograf në AKKP Tiranë
Po ashtu edhe kryeministri Edi Rama do të dëshmojë në GJKKO për këtë çështje, në cilësinë e ish-kryetarit të Bashkisë së Tiranës.
Sipas mbrojtjes së Berishës, Rama është person kyç në këtë proces, duke pretenduar se ishte ai personi që përpiloi bazën ligjore për ndryshimin e destinacionit të truallit nga klub sportiv në shesh ndërtimi.