Presidenti i SHBA-së, Donald Trump, ka kërcënuar se do të vendosë një tarifë prej 25 për qind ndaj çdo vendi që zhvillon marrëdhënie tregtare me Iranin, një masë që mund të ndikojë drejtpërdrejt në tregtinë amerikane me Kinën, Indinë, Emiratet e Bashkuara Arabe, Bashkimin Evropian dhe vende të tjera.
Në një postim në rrjetin social Truth Social, Trump shkroi se masa do të hyjë në fuqi menjëherë.
“Çdo vend që bën biznes me Republikën Islamike të Iranit do të paguajë një tarifë prej 25% për çdo dhe të gjithë biznesin që kryen me Shtetet e Bashkuara të Amerikës. Ky urdhër është përfundimtar dhe i pakthyeshëm”, shkroi Trump.
Kërcënimi vjen pas raportimeve nga organizata për të drejtat e njeriut, sipas të cilave qindra persona janë vrarë gjatë një shtypjeje të ashpër të protestave kundër regjimit iranian, të cilat janë intensifikuar gjatë fundjavës. Trump ka paralajmëruar më herët se SHBA mund të ndërhyjë nëse autoritetet iraniane përdorin dhunë ndaj protestuesve.
“Për Presidentin Trump, kjo duket si një reagim relativisht i butë ndaj një situate shumë serioze në Iran dhe ka gjasa të zhgënjejë shumë anëtarë të komunitetit iraniano-amerikan,” tha Michael Singh, ish-drejtor i lartë për Çështjet e Lindjes së Mesme në Këshillin e Sigurisë Kombëtare gjatë presidencës së George W. Bush.
Sipas tij, problemi kryesor mbetet zbatimi i sanksioneve ekzistuese. “Irani po shet shumë naftë, pavarësisht sanksioneve të ashpra. Pyetja është se çfarë ka të re kjo masë dhe nëse do të zbatohet realisht, ndryshe nga sanksionet aktuale,” shtoi Singh.
SHBA ka pak tregti direkte me Iranin për shkak të sanksioneve të rënda të vendosura ndër vite për programin bërthamor të Teheranit. Sipas të dhënave zyrtare, vitin e kaluar SHBA importoi mallra në vlerë prej vetëm 6.2 milionë dollarësh nga Irani dhe eksportoi rreth 90 milionë dollarë drejt këtij vendi.
Megjithatë, Shtetet e Bashkuara kanë marrëdhënie të konsiderueshme tregtare me vende që bëjnë biznes me Iranin, përfshirë Kinën, Indinë, Emiratet e Bashkuara Arabe dhe Bashkimin Evropian.
Më herët gjatë këtij viti, Trump kishte kërcënuar me tarifa edhe vendet që blejnë naftë ruse, por deri tani masa është aplikuar vetëm ndaj Indisë, duke përjashtuar Kinën.