Ervin Salianji i është drejtuar qytetarëve me një letër nga burgu përpara nisjes së protestës së opozitës.
Në letrën e tij, ai u kërkon qytetarëve të mos dorëzohen, por të luftojnë për dinjitetin dhe të drejtat e tyre, pasi pushteti sipas tij, në këto orë po korr frikën që mbolli vetë.
“Populli shkund çdo tirani”, e mbyll letrën e tij ish-deputeti, teksa kujtojmë se protesta do të nisë në orën 18:00 dhe si asnjëherë më parë, nuk do të ketë fjalime, por vetëm veprime të qytetarëve, që do të marshojnë të paktën deri në orën 22:00.
Letra e plotë e Salianjit:
Në këto orë, ata po korrin frikën që mbollën vetë!
E dimë që menduan se do na frikësonin, e sot më shumë na forcuan. Qëndresa jonë është shpërbërja e tyre! Ne e dimë që shumë nga ne sakrifikojnë e rezistojnë sepse na takon ne së pari të jemi muri që ndal të keqen. Na takon ne dhe vetëm ne të jëmi forca e shembullit.
Miq,
Të humbësh lirinë për të fituar forcën e goditjes ndaj padrejtësisë, është zgjedhje e ndërgjegjies. Të humbësh lirinë në betejë për të fituar demokracinë e qeverisje të mirë për njerëzit, është vlera më e lartë.
Të humbësh lirinë duke fituar besimin në sakrificë është forma më ë lartë e fisnikërisë civile. Të fitosh lirinë duke protestuar me besimin që shqiptarët meritojnë një tjetër zgjidhje, është rruga!
Reago, mos humb veten, as dinjitetin, as të drejtat!
Reago, sepse forca dhe e drejta janë me ty!
Reago! Reago për pagën e degraduar; për fitimin e munguar; për pronën e pafituar, për jetën e shtrenjtuar, për fjalën e cunguar, për shpresën e mpirë, për një Shqipëri më të mirë.
Populli shkund çdo tirani!