Hungaria ka sinjalizuar se do të tërheqë veton ndaj dy kapitujve të fundit të negociatave për anëtarësimin e Ukrainës në Bashkimin Evropian, duke i hapur rrugën Kievit dhe Moldavisë për të negociuar në të gjitha fushat që lidhen me procesin e anëtarësimit.
Budapesti pritej ta konfirmonte këtë vendim në një takim të ambasadorëve të vendeve anëtare të BE-së, që mbahet sot në Bruksel, bënë të ditur për Euronews dy burime diplomatike. Më herët, më 18 nëntor, gazeta The Kyiv Independent kishte raportuar, duke iu referuar diplomatëve të BE-së, se Hungaria kishte tërhequr kundërshtimet e saj.
Sipas Euronews, András Bíró-Nagy, sekretar shteti i Hungarisë për Çështjet e Bashkimit Evropian, la të kuptohej për këtë ndryshim qëndrimi gjatë një diskutimi mbi zgjerimin, përpara mbledhjes së Këshillit të Çështjeve të Përgjithshme në Bruksel, më 19 nëntor.
Dy kapitujt e mbetur përfshijnë agjendën e gjelbër, ku bëjnë pjesë mjedisi, energjia dhe transporti, si dhe bujqësinë. Ukraina hapi kapitullin e parë të negociatave në qershor, të dytin në korrik dhe dy të tjerë në tetor.
Procesi i anëtarësimit të Moldavisë është lidhur në mënyrë joformale me atë të Ukrainës dhe është penguar nga e njëjta veto hungareze.
Pas arritjes së një marrëveshjeje nga ambasadorët, ministrat e 27 vendeve anëtare duhet të miratojnë qëndrimin e përbashkët të BE-së. Më pas, një konferencë ndërqeveritare do të shpallë zyrtarisht hapjen e dy kapitujve.
Hungaria e kishte bllokuar procesin për dy vjet, gjatë kohës kur vendi drejtohej nga ish-kryeministri Viktor Orbán. Pasardhësi i tij, kryeministri Péter Magyar, e hoqi veton në qershor, por gjatë verës ndaloi disa herë hapa të veçantë të procesit, duke e lidhur përparimin me respektimin e të drejtave të pakicës etnike hungareze në Ukrainën perëndimore.
Kievi dhe Budapesti arritën një marrëveshje për të drejtat e pakicave në tetor, e cila më pas u miratua edhe nga Parlamenti ukrainas. Magyar dhe presidenti i Ukrainës, Volodymyr Zelensky, zhvilluan takimin e tyre të parë dypalësh më 16 tetor, në kuadër të samitit të Këshillit Evropian në Bruksel.
Megjithatë, më 20 tetor, Hungaria refuzoi të miratonte hapjen e dy kapitujve të fundit, pa dhënë një shpjegim publik. Euronews raportoi se retorika kundër Ukrainës, e përdorur prej vitesh gjatë qeverisjes së Orbán, e kishte bërë politikisht të vështirë marrjen e këtij vendimi në nivelin e brendshëm.
Magyar ka deklaruar se Hungaria kundërshton çdo proces të përshpejtuar të anëtarësimit të Ukrainës në BE. Sipas tij, Budapesti do ta mbështeste anëtarësimin vetëm nëse Kievi do të përfundonte të gjithë kapitujt e negociatave brenda një periudhe prej 10 deri në 15 vjetësh dhe nëse qytetarët hungarezë do ta miratonin këtë vendim përmes një referendumi detyrues.
Hapja e dy kapitujve nuk do të thotë se anëtarësimi është i afërt. Çdo fazë e procesit kërkon unanimitetin e vendeve anëtare dhe, siç vëren Euronews, shtetet e BE-së mund ta bllokojnë përparimin në më shumë se 100 raste gjatë gjithë procesit.
Kapitulli i bujqësisë pritet të jetë më i vështiri. Në tetor, Komisioni Evropian propozoi që disa produkte bujqësore ukrainase të mbeten jashtë tregut të BE-së dhe të mos përfitojnë nga fondet evropiane edhe pas anëtarësimit të Ukrainës. Propozimi erdhi pas presionit të disa vendeve anëtare, përfshirë Poloninë dhe Francën.
Komisionerja për Zgjerimin, Marta Kos, deklaroi në atë kohë se propozimi kishte si qëllim “mbrojtjen e fermerëve evropianë”.
Nga ana tjetër, kryeministri i Ukrainës, Sergii Koretskyi, deklaroi gjatë një samiti të Euronews, më 3 nëntor, se Kievi nuk mund të pranonte përjashtimin e përhershëm të fermerëve ukrainas nga tregu i vetëm evropian. Sipas tij, çdo kufizim duhet të jetë i përkohshëm dhe proporcional.