Veliaj dorëzohet para Ballukut: Më thonë që Rama është kot, vetëm ti të zgjidh hall! Më aprovo operacionin në këmbë

I pashpresë në kërkesat e vazhdueshme për Edi Ramën dhe Toni Gogun për operacionin në këmbë, Erion Veliaj është dorëzuar dhe i ka kërkuar ndihmë publikisht “armikes” së tij, Belinda Ballukut.

Në një letër nga burgu, Veliaj thotë se ka nevojë urgjente për operacion në këmbë, por kërkesat e tij drejtuar qeverisë kanë rënë në vesh të shurdhër.

Sipas tij, të gjithë në burg i thonë se “Kryeministri është kot, nuk merr dot më asnjë vendim” dhe se “hallin tënd e zgjidh veç Bela”, ndaj edhe ka vendosur të dorëzohet si gjithë shqiptarët e tjerë dhe të shkojë te ajo në ditën e Pranisë Besnike, duke i kërkuar t’i aprovojë operacionin në Tiranë, pranë mjekut dhe familjes.

Letra e plotë:

Znj. Balluku – Dr. e Qarkut Fier,

Siç dihet publikisht, por edhe nga vartësit tuaj në IEVP Fier, po e kaloj izolimin ku më sollët para 1 muaji, me një këmbë të thyer dhe nevojë akute për operacion – kjo të paktën nuk është “sekret”.

Kërkesat e njëpasnjëshme në qeveri tek KM Rama, Min. Gogu dhe drejtoresha e Burgjeve kanë rënë në vesh të shurdhër.

Është evidente ajo që thonë të gjithë këtu, se “Kryeministri është kot, nuk merr dot më asnjë vendim” dhe se “hallin tënd e zgjidh veç Bela”. Ndaj, po dorëzohem edhe unë si gjithë shqiptarët e socialistët e po vij tek ju në ditën e Pranisë Besnike.

Ju kërkoj të aprovoni operacionin tim në Tiranë, pranë mjekut tim dhe familjes sime.

Socialisti “me duar të lidhura”.

Erion Veliaj