Të ardhurat e parashikuara në draftin paraprak të buxhetit 2027, të siguruara nga Monitor pritet të arrijnë rekordin e rreth 910 miliardë lekëve, ose 30.9% të prodhimit të Brendshëm bruto.
Të konvertuara me kursin aktual, buxheti pritet të arrijë një rekord prej gati 10 miliardë eurosh, që gjithsesi në valutë është i fryrë për shkak të zhvlerësimit të euros.
Në raport me buxhetin e rishikuar të vitit 2026, që pret të arkëtojë 843 miliardë lekë, të ardhurat vlerësohet të rriten me 7.7%.
Një zë i ri i futur në projektbuxhetin e vitit 2027 janë ndihmat nga plani i rritjes, që priten 7.6 miliardë lekë, nga 961 milionë lekë në 2026-n, duke e çuar totalin e ndihmave në një rekord prej 24.2 miliardë lekësh.
Burimi kryesor i të ardhurave në buxhet, ato tatimore (nga tatimet e doganat dhe kontributet) pritet të arrijnë në 853 miliardë lekë, me rritje prej 6.9% në krahasim me planin e rishikuar të 2026-s.
Nga këto, 583 miliardë lekë do të mblidhen nga tatimet e doganat, me rritje prej 8.4% në raport me buxhetin e rishikuar 2026.
Nga sigurimet shoqërore do të arkëtohen rreth 211 miliardë lekë, me zgjerim më të ngadaltë prej 4.6%, duke sinjalizuar një rritje më të ngadaltë të pagave. Për krahasim, në 2026-n pritet që buxheti të arkëtojë rreth 202 miliardë lekë nga ky zë, me një rritje të fortë prej 13%.
Të ardhurat nga pushteti lokal pritet të jenë 58.8 miliardë lekë, me rritje të lehtë prej 1.2%, pas zgjerimit të fortë prej 42% në 2026-n, që erdhi si rrjedhojë e dhënies së lejeve rekord të ndërtimit.
Shpenzimet, rekord prej 976 miliardë lekësh, nuk ma më rritje pagash
Totali i parashikuar i shpenzimeve për vitin 2027 është 976 miliardë lekë, me një rritje prej 7.6% në krahasim me buxhetin e rishikuar të 2026-s.
Pas një periudhe dy vjeçare ku pagat në administratë u rritën me shpejtësi, buxheti i 2027-s nuk parashikon shtim të këtij zëri.
Shpenzimet për paga pritet të jenë 122 miliardë lekë, me një rritje prej vetëm 1.7% në krahasim me buxhetin e rishikuar të 2026-s, ose vetëm 2 miliardë lekë më shumë. Për krahasim, në 2026-n fondi i pagave ishte rritur me 12.8%, ose me gati 13 miliardë lekë më shumë, ndërsa në 2025-n me 11 miliardë lekë më shumë.
Për politikat e reja të pensioneve parashikohen 4 miliardë lekë, nga 1.65 miliardë lekë në 2026-n.
Bonusi i lindjeve pritet të jetë 2.8 miliardë lekë, nga 2.3 miliardë lekë në 2026-n.
Shpenzimet kapitale pritet të arrijnë në rekordin e 200 miliardë lekëve, nga 176 miliardë lekë që është realizimi i pritshëm i këtij viti.
Buxheti parashikohet që të ketë një deficit (diferenca mes të ardhurave dhe shpenzimeve) prej 68 miliardë lekësh./Monitor