Përfaqësuesja e Lartë e Bashkimit Evropian, Kaja Kallas, mblodhi ministrat e jashtëm të BE-së në Kiev për të nderuar viktimat e masakrës së Bucha-s, një ngjarje që është bërë simbol i kërkimit për drejtësi dhe përgjegjësi në Ukrainë.
Në një deklaratë të përbashkët, vendet e BE-së, përveç Hungarisë, u angazhuan të sigurojnë “llogaridhënie të plotë” për krimet e luftës që Rusia akuzohet se ka kryer gjatë pushtimit të saj të plotë të Ukrainës.
Përjashtimi i Hungarisë ndodh në një kohë të tensionuar mes Budapestit dhe Ukrainës për tubacionin e naftës Druzhba, i cili ka bllokuar një kredi kritike prej 90 miliardë eurosh për Kievin. Para këtij konflikti, Hungaria kishte shfaqur mosmarrëveshje të forta mbi politikën e përgjithshme të Bashkimit Evropian.
“Llogaridhënia është një element i domosdoshëm për një paqe gjithëpërfshirëse, të drejtë dhe të qëndrueshme, si dhe për respektimin e së drejtës ndërkombëtare,” thuhet në deklaratën e nënshkruar nga 26 shtetet anëtare, së bashku me Ukrainën dhe Kaja Kallas.
Kallas mblodhi disa nga ministrat e jashtëm të bllokut në Kyiv për të përkujtuar katër vjet nga masakra e Bucha-s, gjatë së cilës 400 ukrainas u vranë nga trupat ruse në periferi të Kiev-it.
Fotot e trupave të viktimave të lidhur me duar qëndronin në rrugë dhe tronditën botën, duke ekspozuar shtrirjen e mizorive ndaj civilëve.
“Ajo që ndodhi këtu nuk mund të mohohet,” tha Kallas gjatë vizitës në memorial. “Rusia duhet të mbajë përgjegjësi për atë që ka bërë në Ukrainë.”
Që nga masakra e Bucha-s, Ukraina dhe aleatët e saj kanë promovuar disa iniciativa për të dokumentuar dhe gjykuar krimet e luftës që lidhen me Rusinë.
Në maj të vitit të kaluar, një koalicion i gjerë shtetesh demokratike mbështeti krijimin e një tribunali special për të gjykuar krimin e agresionit, i cili synon përfaqësuesit politikë përgjegjës për nisjen e pushtimit të plotë. Ky tribunal mund të shërbejë për të gjykuar Vladimir Putinin në mungesë, por vetëm pas përfundimit të mandatit të tij.
Tribunali është konceptuar nën kujdesin e Keshillit te Europes, një organizatë për të drejtat e njeriut me bazë në Strasburg. Rreth dhjetë vende kanë shprehur interes për t’u bashkuar me marrëveshjen që mbështet iniciativën, ndërsa Ukraina, Estonia, Lituania dhe Luksemburgu kanë përfunduar procedurat parlamentare.
“Çfarë kërkohet tani është e qartë: vullnet politik dhe angazhim kolektiv,” tha Sekretari i Përgjithshëm i Këshillit të Evropës, Alain Berset.