Presidenti i Shteteve të Bashkuara, Donald Trump, njoftoi se SHBA-ja do të vendosë një tarifë bazë prej 10 për qind për importet nga të gjitha vendet e botës, përfshirë Shqipërinë, Kosovën dhe vendet e tjera të Ballkanit Perëndimor.
Ai njoftoi gjithashtu për tarifa më të larta për dhjetëra vende që kanë suficit tregtar me Shtetet e Bashkuara, duke rritur rrezikun për një luftë tregtare dhe rritje të inflacionit. Tarifa bazë prej 10% do të hyjë në fuqi më 5 prill, ndërsa tarifat reciproke do të hyjnë në fuqi më 9 prill.
Ndërkohë, qeveria e Mbretërisë së Bashkuar po fillon një konsultim me bizneset se si do të ndikonte marrja e masave tarifore kundër SHBA-së, tha sekretari i biznesit dhe tregtisë në Commons.
Jonathan Reynolds, thotë se qeveria beson se një marrëveshje me SHBA-në është “e mundur” dhe “e favorshme”, por shton se Mbretëria e Bashkuar rezervon të drejtën të ndërmarrë çdo veprim që e sheh të nevojshëm nëse një marrëveshje nuk sigurohet.
“Për t’i mundësuar Mbretërisë së Bashkuar që të ketë çdo opsion të hapur për ne në të ardhmen, unë jam duke nisur sot një kërkesë për të dhëna mbi implikimet për bizneset britanike të veprimeve të mundshme hakmarrëse,” deklaroi ai.
Ai shton se ky është një hap formal i nevojshëm për të mbajtur të gjitha opsionet në tryezë. Ata do të kërkojnë pikëpamjet e palëve të interesuara deri më 1 maj për produktet që potencialisht mund të përfshihen në çdo përgjigje tarifore.