Presidenti amerikan Donald Trump ka paralajmëruar Tajvanin që të mos shpallë zyrtarisht pavarësinë nga Kina, vetëm pak orë pas përfundimit të samitit dyditor me presidentin kinez Xi Jinping në Pekin.
“Nuk dua të shoh dikë që shpall pavarësinë”, deklaroi Trump në një intervistë për Fox News, duke riafirmuar qëndrimin tradicional të SHBA-së mbi çështjen e Tajvanit.
Deklarata e tij vjen në një moment tensionesh të larta në rajon, ndërsa Kina ka shtuar stërvitjet ushtarake rreth ishullit dhe vazhdon ta konsiderojë Tajvanin pjesë të territorit të saj.
Presidenti tajvanez Lai Ching-te ka deklaruar më herët se Tajvani nuk ka nevojë të shpallë formalisht pavarësinë, pasi e konsideron veten tashmë një shtet sovran.
Trump theksoi se politika amerikane ndaj Tajvanit nuk ka ndryshuar dhe se SHBA nuk po kërkon përshkallëzim të situatës me Kinën.
“Ne nuk po kërkojmë luftë. Dua që situata të qetësohet. Dua që Kina të qetësohet”, u shpreh ai.
Ai shtoi se gjatë takimit me Xi Jinping është diskutuar gjerësisht çështja e Tajvanit, por ka refuzuar të komentojë nëse SHBA do ta mbronte ushtarakisht ishullin në rast konflikti.
Sipas Trump, presidenti kinez “e ndien shumë fort” çështjen e Tajvanit dhe “nuk dëshiron të shohë lëvizje për pavarësi”.
Nga ana tjetër, Xi Jinping paralajmëroi se çështja e Tajvanit mbetet “tema më e rëndësishme në marrëdhëniet SHBA-Kinë” dhe se menaxhimi i gabuar i saj mund të çojë dy vendet drejt konfliktit.
Shtetet e Bashkuara nuk kanë marrëdhënie formale diplomatike me Tajvanin, por mbajnë lidhje të forta jozyrtare dhe janë të detyruara me ligj t’i ofrojnë ishullit mjete për vetëmbrojtje.
Administrata Trump kishte njoftuar më herët një paketë armësh prej 11 miliardë dollarësh për Tajvanin, përfshirë raketa dhe sisteme të avancuara lëshimi, vendim që kishte shkaktuar reagim të ashpër nga Pekini.
Trump tha se ende nuk ka marrë një vendim përfundimtar mbi miratimin e shitjes së armëve dhe se çështja është diskutuar “në detaje të mëdha” me Xi Jinping.
Ai shtoi gjithashtu se do të duhet të flasë me “personin që drejton Tajvanin”, deklaratë që mund të shkaktojë tensione të reja diplomatike me Kinën.
Zv.ministri i Jashtëm i Tajvanit, Chen Ming-chi, deklaroi se autoritetet tajvaneze do të kërkojnë të kuptojnë më qartë kuptimin e deklaratave të Trump.
Ai theksoi se shitjet amerikane të armëve janë të garantuara nga ligji amerikan dhe mbeten një element kyç për ruajtjen e stabilitetit në rajon.
Edhe ministri i Jashtëm tajvanez, Lin Chia-lung, deklaroi se Tajvani vazhdon të monitorojë nga afër marrëdhëniet SHBA-Kinë dhe akuzoi Pekinin për rritje të rrezikut në rajon përmes “veprimeve agresive ushtarake dhe presionit autoritar”.