Ministria e Infrastrukturës dhe Energjitikës ka hapur një tender për larjen e automjeteve që përdoren nga zyrtarët e këtij institucioni. Tenderi për “shërbim larje autovetura, tapiceri”, ka një fond nën 10 mijë euro ndërkohë procedura është hapur më datë 28 Mars 2025.
Mes automjeteve të listuara që kërkohen që të lahen është edhe ajo e përdorur nga ministrja Belinda Balluku, njëherazi zv.kryeministre e vendit, ben me dije Voxnews.
Sipas dokumentit ku është bërë njoftimi i tenderit nga MIE, automjeti Audi A8 me të cilën lëviz numri dy i qeverisë duhet të larë 12 herë në muaj. E thënë ndryshe, makina e Ballukut duhet të lahet një herë në dy ditë pune.
Ndërkohë janë përcaktuar edhe disa kushte në lidhje me lavazhon që do të zgjidhet për të larë makinat e ministrisë, si:
– Larje e plotë e automjeteve (brenda dhe jashtë) për 30 minuta;
– Pastrimi nga brenda të bëhet me fshesë me kompresor;
– Larje e automjeteve me solucion dhe jo furçë;
– Orari i kryerjes së shërbimit nga ora 07:00 deri në orën 09:00, çdo ditë të javës;
– Automjeti do të presë në radhë për kryerjen e shërbimit, jo më shumë se 30 minuta nga paraqitja në vendin e kryerjes së shërbimit.
