Struktura e Posaçme Kundër Korupsionit dhe Krimit të Organizuar (SPAK) ka publikuar të mërkurën raportin për vitin 2024.
Sipas SPAK, në Shqipëri ekzitojnë 16 grupe kriminale me rrezikshmëri të lartë shoqërore, të cilat operojnë kryesisht në trafikun e kokainës dhe janë të lidhura me tregjet ndërkombëtare të krimit.
Këto grupe kanë strukturuara mbi baza familjare dhe miqësore dhe veprojnë në qarqet e Tiranës, Durrësit, Shkodrës, Kukësit, Lezhës, Elbasanit dhe Vlorës.
Sipas raportit, SPAK ka arritur të provojë veprimtarinë kriminale të 10 prej këtyre grupeve, të cilat operonin në disa qytete të vendit.
Grupet e organizuara përdorin metoda të sofistikuara, përfshirë komunikimet e koduara si SKY ECC dhe pastrimin e parave përmes kriptovalutave.
Ato kanë depërtuar në struktura të rëndësishme të shoqërisë, duke përfshirë gjyqësorin, prokurorinë, policinë, median dhe akademinë
Raporti thekson se grupet kriminale shqiptare mbeten ndër aktorët kryesorë në trafikun ndërkombëtar të drogës, veçanërisht në BE, me praninë e tyre të fortë në Itali, Spanjë, Belgjikë, Holandë, Francë, Gjermani, Zvicër, Norvegji dhe Mbretërinë e Bashkuar. Këto organizata kriminale kanë krijuar rrjete të forta në Amerikën Latine, ku porosisin kokainë direkt nga vende si Bolivia, Meksika, Peruja, Ekuadori dhe Paraguai. Dërgesat e drogës kalojnë përmes porteve kryesore evropiane si Roterdami, Antwerp, Algeciras, Pireu, si dhe përmes Durrësit dhe Tivarit në Ballkan.
Përveç trafikut të drogës, në një shkallë më të vogël, grupet shqiptare janë të përfshira edhe në kontrabandën e qenieve njerëzore dhe krimin kibernetik, duke operuar kryesisht në tregjet e BE-së, Mbretërisë së Bashkuar dhe SHBA-së. Sipas SPAK, shumë nga eksponentët kryesorë të këtyre grupeve janë vendosur në Dubai, duke shfrytëzuar këtë qendër financiare si një pikë strategjike për aktivitetet e tyre kriminale.
Prokuroria e Posaçme thekson se lufta kundër trafikut të drogës mbetet një prioritet, me hetime të thelluara për të goditur rrjetet kriminale që operojnë në këtë fushë.
“Gjatë vitit 2024 numri i çështjeve të regjistruara nga Prokuroria e Posaçme për veprën penale të trafikut të drogës, në kuadrin e grupit të strukturuar kriminal, është 35 çështje me 35 persona nën hetim. Numri i çështjeve nën hetim për këtë vepër penale gjatë këtij viti (mbartur dhe regjistruar gjatë vitit 2024), është 124 çështje me 72 persona nën hetim. Gjatë vitit 2024, numri i këtyre çështjeve të dërguara në gjykatë me kërkesë për gjykim ,është 5 çështje me 33 të pandehur.
Krahasuar me vitin 2023, numri i çështjeve nën hetim për veprën penale të trafikut të drogës, në kuadrin e grupit të strukturuar kriminal, (283/a/2, 333/a, 334) është rritur në masën 3,3% (nga 120 në vitin 2023 në 124 në vitin 2024)”, thuhet në raport.