Gazetari Blendi Fevziu denoncoi mbrëmjen e djeshme punimet në Bypass-in e Vlorës, që ka filluar të ndërtohet 13 vite më parë, por ende nuk kanë përfunduar, pavarësisht se gjatësia e tij është vetëm 18 kilometër.
Fevziu tregonte se si rruga ishte e rrëzuar dhe kishte rrezik për jetën e qytetarëve, sidomos të atyre që udhëtojnë natën, pasi përpara të dalin barrierat pa asnjë shenjë paralajmëruese. Ai e cilësoi skandaloze këtë situatë, pasi deri më tani askush nuk ka mbajtur përgjegjësi për atë që po ndodh në Bypass-in e Vlorës.
Ndërkohë, ka ardhur edhe reagimi i kompanisë “Gener 2” që po bën punimet në këtë rrugë. Sipas kompanisë, punimet e rrugës po kryhen brenda të gjitha standardeve dhe në përputhje me të gjitha kushtet e sigurisë, ndërsa tregon se përfundimi i punimeve të mbetura do të bëhet në 10 Prill të këtij viti.
Gjithashtu kompania thotë se ka zbatuar me rreptësi të gjitha masat e sigurisë, duke vendosur edhe sinjalistikën e nevojshme përgjatë rrugës, sipas të gjitha normave dhe rregullave të qarkullimit automobilistik.
Sipas kompanisë, çdo automjet që mund të ketë kaluar në zonën ku po kryhen punimet, në rastin më të mirë ka injoruar tabelat paralajmeruese, ose në rastin më të keq, ka kapërcyer mbi barrierat ndaluese. Pra, për Gener 2, gazetari Blendi Fevziu ka injoruar tabelat paralajmëruese, ose ka kapërcyer mbi barrierat ndaluese. Por, në videone tij, Fevziu tregon që i thanë policët të kalojë sepse Bypass-i është i hapur.
Reagimi i plotë i Gener 2:
E vërteta e vetme është se ashtu siç është njoftuar disa herë më parë, aktualisht rruga po ndërtohet dhe se ajo është bllokuar për kalimin e automjeteve deri në përfundimin e plotë të punimeve.
Ndërkohë, kompania ka zbatuar me rreptësi të gjitha masat e sigurisë, duke vendosur edhe sinjalistikën e nevojshme përgjatë rrugës, sipas të gjitha normave dhe rregullave të qarkullimit automobilistik.
Nënvizojmë se për realizimin e këtyre punimeve është marrë leje për mbylljen e përkohshme të rrugës nga Autoriteti Rrugor Shqiptar si dhe nga Policia e Shtetit, duke aplikuar planin e miratuar të menaxhimit të trafikut.
Qartësojmë se plani i menaxhinit të trafikut përfshin vendosjen e tabelave, duke filluar nga fillimi i rrugës në km 0 dhe deri në Km 10+450, ku është vendosur edhe bllokimi me neë jersey dhe është lënë i lirë vetëm një akses për mjetet e kantierit, i cili menaxhohet nga flamurtarët gjatë ditës dhe bllokohet gjatë natës.
Theksojmë se në km 15 rruga është e mbyllur totalisht nga të dyja anët si dhe ka prezencë të dy flamurtarëve, të cilët qendrojnë për të dhënë sinjalet përkatëse.
Po ashtu, siç edhe mund të konstatohet lehtësisht në terren, duke filluar nga km 28 deri në km 19+400, ka prezencë të tabelave, të cilat paralajmerojnë për punimet që po kryhen në rrugë si dhe bllokimin të përkohshëm të rrugës.
Në km 19+400 rruga është e mbyllur me neë jersey, ku është lënë vetëm një akses përseri për mjetet e kantierit, i cili menaxhohet nga flamurtarët gjatë ditës edhe mbyllet gjatë natës.
Gjithashtu, në km 15 nga ky drejtim, rruga siç edhe paralajmërohet nga tabelat përgjatë saj, është e bllokuar totalisht.
Bëjmë me dije se çdo qytetar, i cili nuk respekton sinjalistikën dhe nuk i bindet flamurtarëve, vijon me rrugën deri në km 15 edhe pastaj është i detyruar të kthehet sërish, për arsye të bllokimit total të rrugës.
Çdo automjet që mund të ketë kaluar në zonën ku po kryhen punimet, në rastin më të mirë ka injoruar tabelat paralajmeruese, ose në rastin më të keq, ka kapërcyer mbi barrierat ndaluese.
Sakaq, informojmë qytetarët se punimet e rrugës po kryhen brenda të gjitha standardeve dhe në përputhje me të gjitha kushtet e sigurisë ku shumë shpejt Bypass-i i Vlorës do të jetë plotesisht i aksesueshëm.
Data e planifikuar për perfundimin e punimeve të mbetura është 10 Prill 2025